खारेजीमा परेका दूरसञ्चार कम्पनीलाई बक्यौता भुक्तानी गर्न प्राधिकरणले तोक्यो किस्ता रकम

काठमाडौं, ४ माघ । नेपाल दूरसञ्चार प्राधिकरणले तीन दूरसञ्चार कम्पनीलाई बक्यौता भुक्तानी गर्नका लागि किस्ता निर्धारण गरेको छ । मन्त्रिषरिद्णको निर्णय अनुसार प्राधिकरणले कम्पनीहरुले भुक्तानी गर्ने रकम निर्धारण गरेको हो ।

स्मार्ट टेलिकम, वेभ सर्फर र नेपाल स्याटलाईट कम्पनीले लामो समयदेखि बक्यौता भुक्तानी गरेका थिएनन् । कम्पनीले समयमा भुक्तानी नगरेपछि प्राधिकरणले लाईसेन्स खारेजीको निर्णय गरेको थियो । प्राधिरकणले खारेजी गरे पनि मन्त्रालयमा पुगेका कम्पनीलाई मन्त्रिपरिद्को बैठकले किस्तामा बक्यौता भुक्तानी गर्ने गरी छुट दिएको हो ।

मन्त्रिपरिषद्को निर्णय अनुसार प्राधिकरणले कम्पनीहरुलाई किस्ताको लागि पत्राचार गरेको छ । प्राधिकरणले तोकेको किस्ता अनुसार स्मार्ट टेलिकमले पाँच बर्षमा ३ अर्ब ५७ करोड ८१ लाख रुपैयाँ नवीकरण दस्तुर, रोयल्टी, फ्रिक्वेन्सी दस्तुर र ग्रामिण दूरसञ्चार विकास कोष बापतको रकम बुझाउँनुपर्नेछ । कम्पनीले पहिलो किस्ता ५९ करोड ८८ लाख रुपैयाँ बुझाउँनु पर्नेछ । दोस्रो ८३ करोड २३ लाख, तेस्रो, ७७ करोड ४० लाख, चौथो ७१ करोड ५६ लाख र चौथो ६५ करोड ७२ लाख रुपैयाँ बुझाउँनुपर्नेछ ।

नेपाल स्याटेलाईटले पाँच बर्षमा फ्रिक्वेन्सी दस्तुर बापत १ अर्ब ३९ करोड ७४ लाख रुपैयाँ बुझाउँनु पर्नेछ । कम्पनीले पहिलो किस्ता चालु आवको अन्त्यसम्ममा बुझाई सक्नुपर्नेछ । कम्पनीले पहिलो किस्ता २१ करोड ५१ लख बुझाउँनु पर्नेछ । दोस्रो किस्ता ३३ करोड ९८ लाख रुपैयाँ बुझाउँनु पर्नेछ । तेस्रो किस्ता ३० करोड ८६ लाख, चौथो किस्ता २७ करोड ७४ लाख र पाँचौ किस्ता २४ करोड ६३ लाख रुपैयाँ बुझाउँनुपर्नेछ ।

वेभ सर्फर नेपाल कम्यूनिकेशन सिस्टमले भने पाँच बर्षमा ५ करोड ३ लाख रुपैयाँ बुझाउँनु पर्नेछ । जसमध्ये ९५ लाख ५६ हजार रोयल्टी र ४ करोड ३४ लाख ग्रामिण दुरसञ्चार विकास कोषका लागि बुझाउँनुपर्नेछ । कम्पनीले पहिलो किस्ता ८३ लाख ६५ हजार रुपैयाँ बुझाउँनु पर्नेछ । दोस्रो किस्ता १ करोड २८ लाख रुपैयाँ बुझाउँनुपर्नेछ । तेस्रो किस्ता १ करोड १७ लाख, चौथो किस्ता १ करोड ६ लाख र पाँचौ किस्ता ९४ लाख ८५ हजार रुपैयाँ बुझाउँनुपर्नेछ ।