Date

सोम, फाल्गुन २१, २०८०
Mon, March 4, 2024

कोरोनासँग बच्न सरकारले ल्यायो रक्षात्मक उपाय, ५५ देशका नागरिकलाई नेपाल प्रवेशमा रोक

कोरोनासँग बच्न सरकारले ल्यायो रक्षात्मक उपाय, ५५ देशका नागरिकलाई नेपाल प्रवेशमा रोक

काठमाडौं, ६ चैत । विश्वभर महामारीको रुपमा फैलिएको कोरोना भाइरस डिजिज् (कोभिड–१९) सँग बच्न सरकारले रक्षात्मक उपायहरु अघि सारेको छ । नागरिकहरुलाई नआत्तिन तर सचेत र सुरक्षित रहन भनिएको छ । आजदेखि सुरु हुने सेकेण्डरी एजुकेसन इक्जामिनेशन (एसईई) परिक्षा स्थगित गरिएको छ । विश्वविद्यालय र सीटीइभिटीका परिक्षा समेत स्थगित गरिएका छन् । २५ जनाभन्दा बढी भेला हुन प्रतिबन्ध लगाइएको छ भने सिनेमा हल, डान्सबार, हेल्थक्लब, स्वीमिङ पुलहरु बन्द गरिएको छ ।

सार्वजनिक सवारी साधनमा सीट क्षमताभन्दा यात्रु बोक्न नपाइने र सवारीधनीले सार्वजनिक यातायतालाई डिस्इन्फेक्टेड गर्नुपर्ने उल्लेख छ । उपप्रधान तथा रक्षा मन्त्री ईश्वर पोखरेलले नेतृत्व गरेको उच्चस्तरीय समन्वय समितिले यस्तो निर्णय लिएको हो । सरकारका निर्णयले प्रि-लक्डाउनको स्थिति पैदा भएको छ ।

चीनको वुहानबाट शुरु भएको कोरोना भाइरसको महामारी चीनले नियन्त्रणमा लिएपनि अहिले युरोप, पश्चिम एसियाली खाडी देशहरु र अमेरिकामा फैलिएको छ । कोरोना भाइरसका कारण युरोपेली देश इटली सबैभन्दा बढी आक्रान्त बनेको छ । इटलीमा यस भाइरसको संक्रमणका कारण झण्डै ३००० व्यक्तिहरुको मृत्यु भइसकेको छ । चीनमा ३,२०८ व्यक्तिको मृत्यु भएको छ । चीनभन्दा बाहिर इटली सबैभन्दा बढी संक्रमण र मृत्युदर भएको देश हो ।

भारतमा पनि कोरोना भाइरस संक्रमितको संख्या वृद्धि भइरहेको छ । छिमेकी भारतदेखि नेपाली कामदार रहेका दक्षिण कोरिया, पश्चिम एसियाका कतार, कुवेत, बहराइन, ओमन, संयुक्त अरब लगायतका देशमा समेत कोरोना भाइरस फैलिएपछि सरकारले सतर्कता अपनाएको हो ।
सरकारले जारी गरेको सूचनामा कोरोना संक्रमितलाई सरकारी, सामुदायिक र निजी अस्पतालमा उपचारको व्यवस्था मिलाउने, सिनेमाहल तथा सांस्कृति केन्द्र, रंगशाला, खेलकुद, जिम, हेल्थक्लब, म्युजियम, स्वीमिङ पुल, मनोरञ्जन स्थल, डान्सबार आदि चैत मसान्तसम्म बन्द गर्ने उल्लेख छ ।

सरकारले मानिसहरुलाई अत्यावश्यक काममा बाहेक हिंडडुल नगर्न आग्रह गरेको छ । सामाजिक र सांस्कृतिक कार्यहरु, मठमन्दिर, गुम्बा मस्जिद, पार्टी प्यालेस आदि सार्वजनिक स्थलमा २५ जनाभन्दा बढी भेला हुन प्रतिबन्ध लगाइएको छ । गृह मन्त्रालय तथा संस्कृति, पर्यटन र नागरिक उड्ययन मन्त्रालयले यसको अनुगमन गर्ने उल्लेख छ ।

मानिसहरुको जमघट बढी हुने स्थानलाई स्थानीय सरकारले समय समयमा डिस्इन्फेक्सन गर्नुपर्ने उल्लेख छ । त्यस्तै, पर्याप्त आपूर्ति रहेकाले अत्यावश्यक दैनिक उपभोग्य वस्तुको जम्माखोरी नगर्न सरकारले आग्रह गरेको छ । उद्योग, वाणिज्य तथा आपूर्ति मन्त्रालय र गृह मन्त्रालयलाई सघन अनुगमनका लागि खटाइएको छ । आवागमनमा अवरोधका कारण आफ्नो देश फर्कन नसकेका विदेशीहरुले आवेदन दिएमा भीसा अद्यावधिक गरिदिने उल्लेख छ ।

युरोप, पश्चिम एसिया र खाडी क्षेत्रका सबै मुलुकहरु एवं टर्की, मलेसिया, दक्षिण कोरिया र जापानबाट सीधा उडान भइ आउने र ती मुलुकलाई ट्रान्जिट बजाएर आउने अथवा उल्लेखित मुलुकबाट प्रथम यात्रा शुरु गरी जुनसुकै मुलुकलाई ट्रान्जिट बनाएर आउने यात्रुलाई चैत ७ शुक्रबार मध्यरातदेखि चैत ३० आइतबारसम्म आवागमनमा प्रतिबन्ध लगाउने निर्णय सरकारले लिएको छ । वायु सेवा कम्पनी र विदेशस्थित नेपाली कुटनीतिक नियोगले यो सूचना पठाइएको छ । सरकारको ट्राभल एड्भाइजरीका कारण यात्रुले यात्रा रद्द गर्दा या पछि सार्दा निःशुल्क गर्न सकिने व्यवस्था गर्न आग्रह गरिएको छ । सबै शैक्षित प्रतिष्ठानहरु चैत मसान्तसम्मका लागि बन्द गरिएका छन् ।
सरकारी, सामुदायिक, निजी क्षेत्रका तालिम केन्द्र र प्रतिष्ठान बन्द गर्ने तथा सभा, सेमिनार, गोष्ठी, तालिम, सम्मेलन चैत मसान्तसम्म बन्द गरिएको छ । होटल, रिसोर्ट, लज, रेष्टुरेन्ट बारमा ज्वरो मापन गर्ने उपकरण सामग्रीहरुको व्यवस्था गरी उक्त स्थानमा व्यक्तिको स्वास्थ्य जाँच गर्ने प्रबन्ध मिलाउन आग्रह गरिएको छ । कार्यस्थलमा स्यानिटाइजरको प्रबन्ध गर्न र कार्यस्थलका कुर्सि, टेबल, शौचालय, बार, रेलिङमा डिस्इन्फेक्सन गर्न सरकारले आग्रह गरेको छ ।

यसका अतिरिक्त सञ्चार माध्यम र सामाजिक सञ्जालबाट समेत भ्रम फैलाउने काम नगर्न सरकाले आग्रह गरेको छ । यस्तो गरेमा कानूनी कारबाही गरिने सरकारले उल्लेख गरेको छ । सार्वजनिक सेवा प्रवाह गर्ने सरकारी, गैर सरकारी कार्यालयले कार्यलय सफा र डिस्इन्फेक्टेड राख्न आग्रह गरिएको छ । स्थलमार्गबाट नेपाल आउने सबै यात्रुले हेल्थ डिक्लेरेसन फर्म भर्न अनिवार्य गरिएको छ भने उनीहरुको स्वास्थ्य जाँच समेत हुनेछ ।

अर्थकोअर्थ

Related Posts

Leave a Reply

Your email address will not be published. Required fields are marked *

Read also x