व्यवसायलाई राहत दिन विभिन्न करमा छूट, विद्युतीय सवारीको मूल्य बढ्ने

काठमाडौं, १६ जेठ । सरकारले कोभिड–१९ बाट प्रभावित व्यवसायलाई राहत दिन आयकर र मूल्यअभिवृद्धि कर लगायतमा छूट दिने भएको छ । अर्थमन्त्री डा. युवराज खतिवडाले बिहीवार आगामी आर्थिक वर्ष २०७७÷७८ को बजेट वक्तव्यमार्फत यस्तो छूटको घोषणा गरेका हुन् ।

औषधि उद्योगलाई आवश्यक पर्ने कच्चापदार्थको पैठारीमा भ्याट छूट दिने घोषणा गरेको छ । त्यस्तो वस्तु स्वदेशी उद्योगबाट खरीद गर्दा तिरेको भ्याट फिर्ता दिइने भएको छ । कोरोना महामारीबाट प्रभावित भएका हवाई, यातायात, होटेल, ट्राभल तथा ट्रेकिङ व्यवसायीलाई चालू आवको आयकरमा २० प्रतिशत छूट दिने घोषणा गरिएको छ ।

सरकारले भ्याटको दर यथावत् राख्दै अन्तःशुल्क र भन्सारका केही दर भने समायोजन गरेको छ । विशेषगरी १ दर्जनभन्दा बढी वस्तुमा लगाउँदै आएको अन्तःशुल्क घटाइएको छ । उद्योगले पैठारी गर्ने औद्योगिक कच्चापदार्थको भन्सार दर तयारी मालवस्तुको भन्दा कम्तीमा एक तह कम गर्न केही वस्तुको कच्चापदार्थको भन्सार महशुल घटाइएको छ । सरकारले इन्टरनेट सेवा प्रदायकलाई फिक्स्ड ब्रोडब्याण्ड सेवा प्रदान गर्दा ५० प्रतिशतसम्मको मर्मत सम्भार शुल्कमा दूरसञ्चार सेवा दस्तुर छूट दिने व्यवस्था पनि गरेको छ ।

सरकारले विद्युतीय सवारीलाई प्रोत्साहन गर्न दिएको भन्सार सुविधामा कटौती गरेको छ । विद्युतीय गाडीको आयात गर्दा ८० प्रतिशतसम्म अन्तःशुल्क र ४० प्रतिशत भन्सार शुल्क लाग्ने व्यवस्था गरिएको छ । विगतमा यस्ता गाडी आयात गर्दा अन्तःशुल्क शून्य थियो भने भन्सारदर १० प्रतिशत मात्र थियो । यसबाट विद्युतीय सवारीको भाउ बढ्ने भएको छ ।

सरकारले सुनको नयाँ भन्सारदर प्रति १० ग्राम रू. २ हजार पु¥याएको छ । पेट्रोल र डिजेलमा लाग्दै आएको पूर्वाधार विकास कर प्रतिलिटर ५ बाट बढाएर १० रुपैयाँ पु¥याइएको छ । चुरोटमा लाग्दै आएको स्वास्थ्य जोखिम कर प्रतिखिल्ली २५ पैसाबाट बढाएर ५० पैसा पु¥याइएको छ । सुर्ती, खैनी गुट्खा, पानमसलामा लाग्दै आएको जोखिम कर प्रतिकिलो रू. २५ बाट बढाएर ४० पु¥याइएको छ ।