बैंकहरुमा अधिक तरलता, २० अर्बको रिभर्स रिपोमा तेब्बर बढी आवेदन
काठमाडौं, १६ साउन । बैंकिङ प्रणालीमा अधिक तरलता देखिएको छ । पछिल्लो समय बैंकहरुको कर्जा प्रवाह न्यून हुँदा लगानीयोग्य रकम लगातार बढ्दै गएको छ ।
बिहीबार नेपाल राष्ट्र बैंकले निष्काशन गरेको रिभर्स रिपोमा परेको आवेदनले बैंकिङ प्रणालीमा अधिक तरलता रहेको स्पष्ट हुन्छ । राष्ट्र बैंकले २० अर्ब रुपैयाँको रिभर्स रिपो निष्काशन गरेको भए पनि ८३ अर्ब ५ करोड रुपैयाँ बराबरको आवेदन परेको छ । ०.०३३ प्रतिशत ब्याजदर व्याजदर कायम भएको उक्त रिर्पोमा १९ वटा बैंकले आवेदन दिएको राष्ट्र बैंकका प्रवक्ता डा. गुणाकर भट्टले जानकारी दिए ।
यो सात दिनको रिपो भएकाले त्यसपश्चात यो रकम पुनः बजारमै जाने छ । अहिले बैंकहरुसँग २ खर्ब रुपैयाँ अधिक तरलता छ। कोरोना संक्रमण नियन्त्रण्का लागि गरिएको लकडाउनकारण बैंकिङ लगानी घटेपछि बैंकहरुमा अधिक तरलता देखिएको प्रवक्ता भट्टले जानकारी दिए ।
गतसाताको बिहीबार पनि राष्ट्र बैंकले २० अर्ब रुपैयाँको रिभर्स रिपो मार्फत बजारबाट नगद प्रशोचन गरेको थियो । सो समयमा पनि ६८ अर्ब २० करोडको आवेदन परेको थियो ।
