नेप्से परिसूचक ११.३० अंकले वृद्धि, होटल समूहबाहेक सबै समूहको परिसूचक वृद्धि
काठमाडौं, २५ साउन । साताको पहिलो कारोबार दिन आइतवार शेयर बजार ११.३० अंकले बढेको छ । नेप्से परिसूचक ०.८२ प्रतिशत बढेर शेयर बजार १३९२.६८ विन्दुमा पुगेको हो । गत साता एक दिन मात्र बढेर निरन्तर घटेको बजार यो साता भने पहिलो दिनमै बढेको छ ।
बढेको बजारमा ९७ करोड ७८ लाख रुपैयाँ बराबरको शेयर कारोबार भएको छ । १८७ कम्पनीको ३० हजार २०० पटकको व्यापारमा उक्त रकम बराबरको ३२ लाख १२ हजार ३७८ कित्ता शेयर कारोबार भएको हो । कारोबार रकमको सबैभन्दा बढी हिस्सा अजोड इन्स्योरेन्सले ओगटेको छ । उक्त कम्पनीको ९ करोड २१ लाख रुपैयाँ बराबरको शेयर कारोबार भएको हो ।
कारोबारमा आएका १२ ओटा समूहहरुमध्ये होटल समूहको वाहेक बाँकी समूहको परिसूचक बढेको छ । यस दिन होटलको परिसूचक १.८ प्रतिशत घटेको हो । सबैभन्दा बढी म्युचुअल फण्ड समूहको २.०२ र निर्जीवन बीमा समूहको १.६४ प्रतिशत परिसूचक बढेको छ ।
त्यस्तै जीवन बीमाको १.५६ प्रतिशत, व्यापारिकको १.४३ प्रतिशत , वित्तको १.०९ प्रतिशत, अन्यको १.२ प्रतिशत, बैंकिङको ०.६७ प्रतिशत, विकास बैंकको ०.४४ प्रतिशत, जलविद्युतको ०.३२ प्रतिशत, उत्पादन तथा प्रशोधन ०.५७ प्रतिशत र लघुवित्त समूहको ०.६२ प्रतिशत परिसूचक बढेको छ ।
