कार्यान्वयनमा आउँदै नेपाली चियाको ट्रेडमार्क, मापदण्ड पुगेकालाई भदौभित्रै वितरण गरिने

काठमाडौं, ३१ साउन । चिया खेती शुरू भएको डेढ सय वर्षपछि नेपाली चियाले आफ्नै ट्रेडमार्क (लोगो) पाउने भएको छ । नेपाल चिया तथा कफी विकास बोर्डले नेपाली चियाको ट्रेडमार्क कार्यान्वयन अन्तिम तयारी गरेको हो ।
एउटै लोगो प्रयोगका लागि चिया उद्योगी, व्यवसायीबाट निवेदन माग गरिएकामा ४२ वटा निवेदन आएको बोर्डले बताएको छ । ‘नेपाली अर्थोडक्स चिया सर्टिफिकेसन ट्रेडमार्क कार्यान्वयन निर्देशिका, २०७४’ निर्देशिकाले तय गरेको मापदण्ड सम्बन्धित उद्योगी तथा व्यवसायीले पूरा गरे–नगरेको अध्ययनपछि लोगो प्रयोगका लागि सिफारिस गरिने बोर्डले बताएको छ ।
भदौ महिनाभित्रै लोगो प्रदान गर्नेगरी प्रक्रिया अघि बढाइएको बोर्डले जानकारी दिएको छ । लोगो प्रयोग गर्नुअघि व्यवसायीले उत्पादन गरेको चियाको परिमाण, हरियो पत्ती र तयारी चियाका परिमाण बोर्डले निरीक्षण गर्नेछ । यस्तै व्यवसायीले निकासी गरेको चियाको तथ्यांक समेत बोर्डमा रहनेछ ।
निर्देशिकामा भएका विषय र आचार संहितालाई उल्लंघन गरको पाइए उक्त लोगो खोस्न पनि सक्ने अधिकार पनि बोर्डसँग रहेको छ । लोगो प्रयोग गरेबापत उद्योगी व्यवसायीले प्रतिकिलो ५० पैसा बोर्डमा जम्मा गर्नुपर्ने व्यवस्था निर्देशिकामा उल्लेख छ । कार्यान्वयनमा ल्याइएको लोगो आफ्नो उत्पादन निकासी हुने देशमा पनि दर्ता गराउन भने अनिवार्य छ । बोर्डले यसअघि अमेरिका, यूएई र भारतमा नेपाली चियाको लोगो दर्ताका लागि प्रक्रिया अघि बढाएको थियो । नेपालबाट हाल रूस, जर्मनी लगायत युरोपियन मुलुकमा नेपाली चिया जाने गरेको छ । मुलुकको इलाम, झापा, पाँचथर, धनकुटा, तेह्रथुमसहित १४ जिल्लामा ५९ प्रतिशत किसानले ८ हजार ८३८ हेक्टरमा चिया खेती गर्दै आएको बोर्डको तथ्यांक छ ।

Leave a Reply

Your email address will not be published. Required fields are marked *