एनआईसी एशिया बैंकमा क्यूआर मर्चेन्टहरु आबद्ध गराउँदा १० जनाले ५० हजार प्राप्त गर्न सक्ने
काठमाडौं, ११ भदौ । एनआईसी एशिया बैंकले नयाँ क्यूआर मर्चेन्ट रिफर गर्दा नगद पुरस्कार दिने ‘क्यूआर रिफर एण्ड अर्न’ योजना ल्याएको छ । यो योजनामा बैंकका क्यूआर मर्चेन्ट तथा ग्राहकहरूले भदौ र आसोज महिनाभरी सहभागी जनाउँन सक्नेछन् ।
यस योजनामा बैंकसँग रहेका क्यूआर मर्चेन्ट एवं ग्राहकहरूले उक्त २ महिनाको अवधीमा नयाँ क्यूआर मर्चेन्ट रिफर गरी बैंकमा चालु खाता खोलेर क्यूआरमा आबद्ध भए बैंकले प्रति रिफर मर्चेन्ट ७५० रुपैयाँ खुद रकम प्रदान गर्ने जनाएको छ । साथै, सो २ महिनाको अवधिमा सबैभन्दा बढी नयाँ मर्चेन्ट रिफर गरी क्यूआर मर्चेन्टहरू बैंकमा आबद्ध गराउने १० जनालाई थप जनही ५० हजार रुपैयाँ रकम प्रदान गरिने समेत व्यवस्था गरिएको बैंकले जनाएको छ ।
स्मार्टफोन प्रयोगकर्ताहरूको संख्या उल्लेख्य बृद्धि भएसँगै क्यूआर पेमेन्टबाट भुक्तानी गर्ने संख्यामा समेत तीव्र रुपमा बृद्धि भइरहेको र सरकारको डिजिटल नेपाल फ्रेमवर्क अभियानलाई सहयोग गर्ने र नगद कारोबारको सट्टा डिजिटल कारोबारतिर ग्राहकलाई आकर्षित गरी अगाडि बढ्ने योजनालाई बैंकले प्राथमिकता दिएको बताइएको छ । यो बाहेक बैंकले ग्राहक केन्द्रित विभिन्न योजनाहरु ल्याएको छ ।
हाल बैंकले मुलुकभर ३२६ शाखा कार्यालयहरू, ४६६ एटीएम, १०२ वटा एक्स्टेन्सन काउण्टर र ६४ वटा शाखा रहित बैंकिङ्गमार्फत् सेवा दिँदै गर्दै आएको छ ।
