महामारीका बेला उपभोक्ता हितविपरीत गतिविधि बढ्यो, ४८४ फर्ममा कैफियत, १३७ वटालाई कारबाही

काठमाडौं, ५ कात्तिक । कोरोना महामारीको विषम परिस्थितिमा समेत उपभोक्ता हित विपरीतका गतिविधिमा कमी आएको छैन । वाणिज्य, आपूर्ति तथा उपभोक्ता हित संरक्षण विभागले पछिल्लो समय गरेको बजार अनुगमनले यस्ता गतिविधि बढ्दै गएको देखाएको छ ।
विभागले गत असोज १ देखि ३० गतेसम्म गरेको बजार अनुगमनका क्रममा कानून र मापदण्डविपरीत कार्य गर्ने १३७ फर्म कारबाहीमा परेका छन् । विभागका सूचना अधिकारी रवीन्द्र आचार्यका अनुसार १ महिना अवधिमा ८०१ फर्मको अनुगमन गर्दा ४८४ फर्ममा सामान्य कैफियत देखिएर तत्काल सुधार गर्न निर्देशन दिइएको छ भने १३७ फर्मलाई जरीवाना कारबाही गरिएको हो, जसबाट रू. ७८ लाख ५७ हजार राजस्व असुल भएको विभागले बताएको छ ।
अनुगमनका क्रममा रू. ९८ हजार ७८२ बराबरको खान अयोग्य तथा म्याद सकिएको खाद्य वस्तु नष्ट गरिएको विभागले बताएको छ । सूचना अधिकारी आचार्यका अनुसार सो अवधिमा १०४ फर्मलाई आवश्यक कागजात वा स्पष्टीकरण पेश गर्न, २२ फर्मको कारोबार रोक्का तथा सिलबन्दी गरिएको र ६ जना व्यक्ति तथा साधनलाई नियन्त्रणमा लिइएको थियो । विभागको तथ्यांक अनुसार गैरकानूनी व्यापारिक क्रियाकलाप गर्नेमध्ये सबैभन्दा धेरै फलफूल तथा तरकारी पसललाई जरीवाना गरिएको छ । ३३ ओटा फलफूल तथा तरकारी पसलको अनुगमन गर्दा २२ पसललाई कारबाही गरिएको थियो । यसैगरी फलफूल तथा तरकारी पसलपछि सबैभन्दा धेरै कारबाही पानी उद्योगलाई गरिएको छ । ४५ पानी उद्योगको अनुगमन गर्दा १४ उद्योगलाई कारबाही गरिएको छ । साथै अनलाइन पसल, औषधि पसल, किराना पसल र गार्मेन्ट, ग्यास पसल, पार्टी प्यालेस, मार्ट र रेष्टुराँहरूले समेत मापदण्ड विपरीत कार्य गरेको पाइएको छ ।
विगत १ महीना अवधिमा काठमाडौं उपत्यकाभित्र सञ्चालनमा रहेका ६० खालका फर्म तथा उद्योगको अनुगमन गरिएको बताइएको छ । उपभोक्ता संरक्षण ऐन, २०७५ बमोजिम अनुचित व्यापारिक कारोबार गर्ने पसललाई जरीवाना गरिएको विभागले बताएको छ ।