बन्दाबन्दी खुले पनि दुग्ध उत्पादनको दैनिक खपत ७० प्रतिशत मात्र

काठमाडौं, २१ कात्तिक । कोभिड रोकथामका लागि लामो समयसम्म गरिएको बन्दाबन्दी खुले पनि दुग्ध व्यवसाय अझै लयमा फर्किनसकेको व्यवसायीले बताएका छन् । बन्दाबन्दी हटेपछि विभिन्न व्यवसाय खुले पनि होटल, विद्यालय लगायत बन्द हुँदा दैनिक ७० प्रतिशतसम्म मात्र दूध तथा दुग्धजन्य वस्तुको खपत भएको डेरी व्यवसायीले बताएको राससमा उल्लेख छ ।
बन्दाबन्दीका बेला दैनिक रू। १० करोडसम्म नोक्सानी भएको भन्दै नेपाल डेरी एशोसिएशनले बन्दाबन्दी खुलेर बजारमा चहलपहल हुँदा विस्तारै दुग्ध खपत पनि बढ्दै गएको बताएको छ । यद्यपि अझै दूध र दुग्धजन्य वस्तुको खपत बढी हुने शहर बजार क्षेत्रमा बस्दै आएका अधिकांश नागरिक गाउँमै रहँदा खपत कम भएको संघका महासचिव प्रल्हाद दाहालको भनाइ छ ।
बन्दाबन्दीको बेला दूग्ध खपत कम हुँदा स्टक रहेका सामग्री विस्तारै खपत भएको संघले बताएको छ । त्यति बेला रू। ५ अर्बभन्दा बढीको स्टक सामग्री हुँदा स्टोर क्षमता समेत नभएको अवस्थामा हाल रू। १ अर्ब बराबरको मात्र रहेको दाहालले जानकारी दिए ।
बन्दाबन्दीपछि दैनिक संकलन समेत घटेको संघले बताएको छ । हाल दैनिक दूध संकलनमा ३० प्रतिशत कमी आएको अध्यक्ष दाहालको भनाइ छ ।
नेपालमा दैनिक ६२ लाख लिटर दूध उत्पादन हुने गरेकोमा औपचारिक क्षेत्रमा १७ प्रतिशत र अनौपचारिक क्षेत्रमा ३३ प्रतिशत खपत हुँदै आएको छ संघको तथ्यांक छ । यस्तै कृषक स्वयंले ५० प्रतिशत उपभोग गर्ने गरेका छन् ।