उपत्यकाका तीन स्थानमा फ्लाइओभर निर्माणका लागि विस्तृत डिजाइनको काम हुँदै
काठमाडौं, २२ पुस । काठमाडौं उपत्यकाका तीन स्थानमा फ्लाइओभर निर्माणका लागि विस्तृत डिजाइनको काम अघि बढेको छ । ग्वार्को, सातदोबाटो र एकान्तकुनामा फ्लाइओभर निर्माणका लागि परामर्शदाता कम्पनीले अध्ययन प्रतिवेदनकोे बीचको प्रगति पेश गरेको सडक विभागले बताएको छ ।
यसका लागि अहिले विस्तृत डिजाइन गर्ने काम अघि बढिरहेको महानिर्देशक केशवकुमार शर्माले जानकारी दिएको राससमा उल्लेख छ । यस वर्ष निर्माणका लागि ठेक्कामा जान सकिने उनको भनाइ छ ।
यस वर्ष ग्वार्कोमा निर्माणका लागि प्रक्रियामा जाने र आगामी आवमा सातदोबाटो र एकान्तकुनामा फ्लाइओभर निर्माण अघि बढाइने योजना रहेको छ । चीन सरकारले दुई वर्ष पहिले निर्माण सम्पन्न गरेको चक्रपथको चोकहरुमा फ्लाइओभर निर्माणको योजना बनाइएको छ ।
सरकारले चालु आर्थिक वर्षमा उपत्यकामा फ्लाइओभर निर्माणका लागि बजेट छुट्याएको छ । उपत्यकाका अरु विभिन्न स्थानमा वैदेशिक लगानीमार्फत फ्लाइओभर’ बन्न लागेकाले विभागले सरकारको लगानीमा निर्माण गर्न यी स्थान छानेको हो । सरकारको लगानीमा निर्माण हुन लागेका यी नै पहिलो फ्लाइओभर हुनेछन् । ती फ्लाइओभर’ चार लेनको हुने विभागले बताएको छ ।
काठमाडौँ उपत्यकामा सवारी साधनको चाप सबैभन्दा बढी हुने स्थान बानेश्वर र जडीबुटी चोक रहेका छन् । यी दुवै स्थानमा जापान अन्तर्राष्ट्रिय सहयोग नियोगले फ्लाइओभर’ वा सुरुङ निर्माण गर्ने योजना बनाएको छ ।
