अनुचित व्यापारिक कारोबार बढ्दै, एक महिनामै सयभन्दा बढी फर्म कारबाहीमा
काठमाडौं, १४ माघ । पछिल्लो समय उपभोक्ता बजारमा अनुचित व्यापारिक गतिविधि बढेको पाइएको छ । वाणिज्य, आपूर्ति तथा उपभोक्ता हित संरक्षण विभागले एक महीनामा १०० भन्दा बढी फर्मलाई कारबाही गर्नुले उपभोक्ता हित विपरित व्यापारिक कारोबार बढेको देखिन्छ । विभागले अनुचित व्यापारिक कारोबार गरेको भन्दै पुस महिनामा १०९ फर्मलाई कारबाही गरेको छ ।
काठमाडौं उपत्यकासहित देशका विभिन्न क्षेत्रमा गरिएको बजार अनुगमनका क्रममा १३ लाख ७४ हजार रुपैयाँ राजस्व संकलन गरिएको विभागका सूचना अधिकारी शिवराज सेढाईंले जानकारी दिए । उनका अनुसार एक महीनाको अवधिमा विभिन्न २८ विषयगत क्षेत्रका ३५१ ओटा फर्मको अनुगमन गरिएको थियो ।
तिनमा १६८ ओटा फर्मलाई तत्काल सुधार गर्न सामान्य निर्देशन दिइएको र १ लाख ३३ हजार रुपैयाँभन्दा बढीको म्याद सकिएका सामग्री नष्ट गरिएको, ६६ ओटा फर्मलाई स्पष्टीकरण सोधिएको तथा छ फर्मबाट नमूना संकलन गरिएको बताइएको छ ।
एक महीनाको अवधिमा सबैभन्दा धेरै खाद्यान्न पसललाई कारवाही गरिएको उनले बताए । यस्तै १०६ ओटा खाद्यान्न पसलको अनुगमन गर्दा २७ ओटा फर्म अनुचित व्यापारिक कारोबारमा संग्लन भएको पाइएपछि कारबाही गर्दा ४४ लाख ५ हजार राजस्व संकलन भएको छ ।
यसैगरी अनुगमन गरिएका खाद्यान्न फर्ममध्ये ६२ ओटा फर्मलाई सामान्य निर्देशन दिइएको, ५४ हजार बराबरको म्याद सकिएका खाद्यान्न नष्ट गरिएको र १६ ओटा फर्मलाई स्पष्टीकरण सोधिएको थियो ।
अनुगमनका क्रममा उपभोक्तासँग बढी मूल्य लिने, कृत्रिम अभाव सिर्जना तथा कालोबजारी गर्ने, म्याद सकिएका खानेकुरा बेच्ने तथा खरीद विक्री बिल नराख्ने फर्मलाई ५ हजारदेखि ३ लाख रुपियाँसम्म जरिवाना गरिएको विभागले बताएको छ । उपभोक्ता संरक्षण ऐन, २०७५ बमोजिम अनुचित व्यापारिक कारोबार गर्ने पसललाई जरिवाना गरिएको विभागले बताएको छ ।
