नेप्से परिसूचकको उच्च विन्दु कायमै, १५ अर्ब ४१ करोड रुपैयाँको शेयर कारोबार
काठमाडौं, २७ साउन । बुधबार नेप्से परिसूचक स्थिर रहेको छ । कारोबार सुरुवाल भएको केही समयमा नै करिव ३२०० विन्दु नजिक पुगेको परिसूचक फर्किएर हिजो कै विन्दुमा रोकिएको हो । गत कारोबार दिन उच्च अंकले वृद्धि भएको परिसूचक बुधबार ०.७६ अंकले वृद्धि भएर ३१६२.७६ विन्दुमा रोकिएको छ । हिजोको तुलनामा परिसूचक ०.०२ प्रतिशतले वृद्धि भएको हो ।
आज २३० वटा कम्पनीको २ करोड ७२ लाख ४९ हजार कित्ता शेयर १५ अर्ब ४१ करोड ७९ लाख रुपैयाँमा खरिद विक्री भएको छ । कारोबारमा आएका १३ समूहमध्ये ५ वटा समूहको परिसूचक वृद्धि भएको छ भने बाँकी समूहको परिसूचक घटेको छ । परिसूचक वृद्धि हुनेमा होटल तथा पर्यटन समूह २.७८ प्रतिशत, हाइड्रोपावर समूह ३.९२ प्रतिशत, निर्जीवन बीमा समूह ०.३ प्रतशित, लघुवित्त समूह ०.१४ प्रतिशत र जीवन बीमा समूह ०.०६ प्रतिशत रहेका छन् ।
आज ५ वटा कम्पनीको शेयर मूल्य १० प्रतिशतले वृद्धि भएको छ । १० प्रतिशतले परिसूचक वृद्धि हुनेमा आईसीएफसी फाइनान्स लिमिटेड, रिदी हाइड्रोपावर डेभलपमेन्ट कम्पनी लिमिटेड, रुरु जलविद्युत परियोजना लिमिटेड, जीवन विकास लिघुवित्त वित्तीय संस्था लिमिटेड र यूनियन लाइफ इन्स्योरेन्स कम्पनी लिमिटेड रहेका छन् ।
सर्वाधिक मूल्यको शेयर कारोबार अपर तामाकोशी हाइड्रोपावर लिमिटेडको भएको छ । यो कम्पनीको ६८ करोड ८ लाख रुपैयाँ भन्दा बढीको शेयर कारोबार भएको छ । आज यो कम्पनीको शेयर मूल्य ९०३ रुपैयाँ कायम भएको छ ।
