उदिपुर–मार्कीचोक–भरतपुरको प्रसारण लाइन निर्माण ५० प्रतिशत
लमजुङ, २ फागुन । मस्र्याङ्दी कोरिडोरअन्तर्गत निर्माणाधीन २२० केभी उदिपुर–मार्कीचोक–भरतपुर डबल सर्किट प्रसारण लाइन आयोजनाको निर्माण ५० प्रतिशत सम्पन्न भएको छ । विविध कारणले यस आयोजनाको निर्माणमा ढिलाइ हुँदा अझै ५० प्रतिशत निर्माण गर्न बाँकी रहेको आयोजनाका महाशाखा प्रमुख नारायण रेग्मीले बताए ।
उनका अनुसार लमजुङको उदिपुरदेखि चितवनको भरतपुरसम्म यो प्रसारण लाइन पुग्नेछ । त्यसका लागि १९३ ओटा टावर आवश्यक पर्ने उहाँको भनाइ थियो । यीमध्ये हालसम्म १८ टावर खडा भइसकेको छ भने ४५ टावरको जग तयार गर्ने कार्य भएको छ ।
‘दोर्दी कोरिडोरका आयोजनाको विद्युत् मध्यमस्र्याङ्दी जलविद्युत् केन्द्रको स्वीचयार्डसम्म पु¥याउन ६ किलोमिटरसम्म यही प्रसारण लाइनको काम अघि बढिरहेको छ । उदिपुरदेखि मध्यमस्र्याङ्दी खण्डको ६ किलोमिटर खण्डमा १७ ओटा टावर उठाइएकाले सोमवारदेखि तार तान्ने कार्य भइरहेको महाशाखा प्रमुख रेग्मीले बताए ।
उनका अनुसार तार तान्ने काम दुई महिनाभित्र सम्पन्न हुनेछ । ६ किलोमिटर खण्डको निर्माण गत जेठभित्रै सम्पन्न गर्ने लक्ष्य रहे पनि कोरोनाको महामारी रोकथामका लागि लगाइएका निषेधाज्ञालगायत विविध कारण निर्माण अवधि लम्बिएको बताइएको छ । ६ किलोमिटर खण्डबाहेक लमजुङकै राइनास नगरपालिकास्थित धमिलिकुवा र आँबुखैरेनीदेखि भरतपुर खण्डमा पनि टावर निर्माणको काम भइरहेको छ । ४५ टावरको काममध्ये लमजुङतर्फ ३५ र तनहुँतर्फ १० टावर उठाउने काम भइरहेको छ । १८ ओटा खडा भएको टावरमध्ये १७ उदिपुरदेखि मध्मस्र्याङ्दीसम्म र एक लमजुङकै फुलबारीमा खडा भएको छ । आयोजनाको तीन खण्डमा यतिबेला काम भइरहेको छ । त्यस्तै लमजुङ उदिपुर र भरतपुरमा गरी दुईओटा सबस्टेसन पनि निर्माण भइरहेको उक्त आयोजनाले बताएको छ ।
२२० केभीको उक्त आयोजनाको निर्माण सन् २०१८ जनवरी १७ गतेदेखि अघि बढेको र तीन वर्षभित्र सबै काम सम्पन्न गर्नुपर्ने भए पनि विविध कारणले सम्पन्न हुन नसकेको डिभिजन प्रमुख रेग्मीको भनाइ थियो । उक्त सम्झौताअनुसार तीन वर्ष नाघेपछि थप गरिएको समयावधि पनि सकिन दुई तीन महिना मात्र बाँकी रहेकाले अझै निर्माण अवधि थपिने भएको छ ।
चिन्जा गुप्र चाइना कम्पनीले निर्माण गर्दै आएको छ । आयोजना सम्पन्न गर्न पौने तीन अर्ब रुपैयाँ लाग्ने अनुमान गरिएको उनले जानकारी दिए ।
