चोरिको मोटरसाईकल सहित २ जना पक्राउ
फागुन १० , काठमाडौँ । काठमाडौँको सामाखुशीबाट दुई जनालाई चोरीको मोटरसाईकल सहित महानगरीय ट्राफिक प्रहरी महाशाखाले नियन्त्रणमा लिएको छ ।
महाशाखाबाट सादा पोसाकमा खटिएको ट्राफिक टोलीले सामाखुशीबाट महोत्तरी बर्दीबास घर भई कपन बस्ने वर्ष २० को संजय विश्वकर्माले वास्तविक नम्वर परिवर्तन गरि प्रदेश ३(०२(१२ प ५५८२ नम्वर भएको एनएस पल्सर मोटरसाइकल सहित नियन्त्रणमा लिएको महाशाखाका प्रमुख प्रहरी वरिष्ठ उपरीक्षक उमेश राज जोशीले जानकारी दिए ।
वास्तविक नम्बर बा ८५ प ९०३४ भएको उक्त मोटरसाईकल यहि पुसमा धुम्बाराहीबाट हराएको भनी मोटरसाईकल धनी सन्तोष श्रेष्ठले जानकारी गराएको एसएसपी जोशीले बताएका थिए । सोही स्थानबाट बा ९७ प ३१५५ नंम्बरको पल्सर मोटरसाईकल सहित संखुवासभाको खाँदबारी घर भई काठमाण्डौं बस्ने रमेश राई नियन्त्रणमा आएका हुन ।
कपन बस्ने निर्मल कार्कीले उक्त मोटरसाईकल चोरी भएको भनी यहि असोजमा निबेदन दिएको महाशाखाले जनाएको छ । मोटरसाईकल सहित पक्राउ परेका दुबै जनालाई चोरी मुद्दा अनुसन्धान एव कारबाहिका लागी महानगरीय प्रहरी बृत्त महाराजगंजमा पठाइएको महाशाखाले जानकारी दिएको हो ।
