राजस्व परामर्श समितिले नीति तथा कर सुधार सम्बन्धमा सुझाव संकलन गर्दै
काठमाडौं, ६ वैशाख । राजस्व परामर्श समितिले नीति तथा कर सुधार सम्बन्धमा सोमबार सुझाव संकलन गरेको छ । आगामी आर्थिक वर्षको बजेट नजिकिए सँगै नेपाल आर्थिक पत्रकार समाज (सेजन) सँगको छलफलमा राजस्व परामर्श समितिले पनि सुझाव संकलन गरेको हो ।
नेपाल आर्थिक पत्रकार समाज (सेजन) सँगको छलफलमा समिति अध्यक्ष महेश दाहालले आगामी वैशाख २८ गतेसम्म अर्थमन्त्रीलाई सुझाव प्रतिवेदन दिने तयारी गरिरहेको बताए । उनले करको दर भन्दा पनि दायरा विस्तारलाई प्राथमिकतामा राखेर सुझाव दिइने बताएका थिए । करको दायरा विस्तार, करका सीमा परिमार्जनलगायतका विषयमा आएका सुझाव समेटेर प्रतिवेदन दिइने उनले बताए ।
कार्यक्रममा कार्यपत्र प्रस्तुत गर्दै राजस्व विज्ञ डा. रूप खड्काले मूल्य अभिवृद्धि कर छुट सुविधाका कारण राजस्वको क्षेत्र साँघुरिएको बताएका थिए । स्वयम् कर पालना नहुँदा राजस्व चुहावट भएको, गैर–कर राजस्व प्रशासन कमजोर रहेको, स्थानीयरप्रदेशले आन्तरिक राजस्वलाई भन्दा केन्द्र सरकारको सहयोगबाट सञ्चालित भएको उनले बताए ।
निश्चित थ्रेसहोल्ड राखेर सबै सेवा तथा वस्तुलाई भ्याटको दायरामा ल्याउनुपर्ने उनले बताए । त्यसले वस्तु तथा सेवालाई प्रतिस्पर्धी बनाउने उनको भनाइ छ । उनले राजस्व छुट पुनरवलोकन गर्नुपर्ने पनि सुझाव दिए । वार्षिक करिब १ खर्ब ३० अर्ब भन्दा बढी भ्याट छुट दिइने गरेको बताइएको छ ।
