प्रभु बैंकको नाफा साढे ४८ प्रतिशतले बढ्यो, वितरणयोग्य मुनाफा घट्यो
काठमाडौं, २० साउन । प्रभु बैंकले गत आर्थिक वर्ष २०७९/८० मा दुई अर्ब ८२ करोड ५२ लाख रुपैयाँ नाफा आर्जन गरेको छ । शनिबार सार्वजनिक गरेको बैंकको अपरिष्कृत वित्तीय विवरण अनुसार अघिल्लो आर्थिक वर्षको तुलनामा नाफा ४८.५४ प्रतिशतले वृद्धि भएको हो । अघिल्लो वर्षको सोही अवधिमा बैंकले एक अर्ब ९० करोड २० लाख रुपैयाँ नाफा आर्जन गरेको थियो ।
बैंकको खुद ब्याज आम्दानी र सञ्चालन नाफामा सुधार आएका कारण नाफा बढेको देखिएको छ ।
अघिल्लो आवको असार मसान्तको तुलनामा बैंकको खुद ब्याज आम्दानी ७८.६२ प्रतिशतले बढेर १० अर्ब २५ करोड ७९ लाख रुपैयाँ पुगेको छ । यस्तै बैंकको सञ्चालन नाफा ४७.५२ प्रतिशतले बढेर चार अर्ब २० करोड ७७ लाख रूपैयाँ रहेको छ । बैंकको वितरणयोग्य नाफा १६ करोड १६ लाख ५५ हजार रुपैयाँ रहेको छ । अघिल्लो वर्ष यो बैंकको वितरणयोग्य नाफा एक अर्ब तीन करोड २९ लाख रुपैयाँ थियो । सेन्चुरी बैंकसँग मर्जरमा गएको यो बैंकको वितरणयोग्य नाफा भने घटेको छ ।
बैंकको चुक्ता पुँजी २३ अर्ब ५४ करोड २४ लाख ९० हजार रुपैयाँ रहेको छ भने जगेडा कोषमा १० अर्ब २ करोड आठ लाख ७७ हजार रुपैयाँ रहेको छ ।
असार मसान्तसम्म बैंकले दुई खर्ब ८९ अर्ब नौ करोड नौ लाख रुपैयाँ निक्षेप संकलन गरेको छ । त्यस्तै दुई खर्ब ३८ अर्ब २१ करोड पाँच लाख रुपैयाँ कर्जा लगानी गरेको छ ।
अघिल्लो आर्थिक वर्षको असार मसान्तसम्म १.८६ प्रतिशत रहेको खराब कर्जा गत वर्षको असार मसान्तसम्ममा ४.१६ प्रतिशत पुगेको छ ।
बैंकको प्रतिशेयर आम्दानी १२ रुपैयाँ रहेको छ । बैंकको प्रतिशेयर नेटवर्थ १४३ रुपैयाँ २५ पैसा रहेको छ । बैंकको स्प्रेडदर ४.८६ प्रतिशत रहेको छ भने बेसरेट १०.०६ प्रतिशत रहेको छ ।
