स्वास्थ्य क्षेत्रमै पहिलो पटक आईपीओ जारी गर्दै ह्याम्स अस्पताल, आईपीओ बिक्री प्रबन्धकमा मुक्तिनाथ क्यापिटल
काठमाडौं, २९ असोज । हस्पिटल फर एडभान्स्ड मेडिसिन एण्ड सर्जरी लिमिटेड (ह्याम्स अस्पताल)ले सर्वसाधारणका लागि प्राथमिक सेयर (आईपीओ) जारी गर्ने भएको छ ।
कम्पनी पब्लिक लिमिटेडमा गएपछिको पहिलो साधारणसभाले सर्वसाधारणका लागि ११ लाख २५ हजार कित्ता सेयर जारी गर्ने निर्णय गरेको हो । जुन जारी पुँजीको १५ प्रतिशत हो । प्रतिकित्ता १०० रुपैयाँका दरले सर्वसाधारणमा सेयर जारी हुनेछ । बाँकी ८५ प्रतिशत सेयर स्वामित्व भने संस्थापक समूहको हुने अस्पतालले जनाएको छ ।
सर्वसाधारणलाई निष्कासन गरिएको सेयरमध्ये पाँच प्रतिशत सेयर कर्मचारीका लागि जारी गरिने साधारणसभाले निर्णय गरेको छ । अस्पतालले सेयर निष्काशनका लागि बिक्री प्रबन्धकमा मुक्तिनाथ क्यापिटललाई समेत नियुक्त गरिसकेको छ ।
यसका साथै सभाले आफ्ना सेयरधनीहरूलाई १७.३८ प्रतिशत बोनस सेयर र ०.६७ प्रतिशत नगद लाभांश वितरण गर्ने भएको छ ।त्यसपश्चात् कम्पनीको कुल पुँजी ६३ करोड ७५ लाख रुपैयाँ हुनेछ ।
साधारणसभाले पाँच सदस्यीय सञ्चालक समिति गठन गरेको छ । जसमा संस्थापक सेयरधनीको तर्फबाट रामशरण भण्डारी, दलबहादुर भण्डारी र प्रेमबहादुर भण्डारी नियुक्त भएका छन् ।
यस्तै, सर्वसाधारणतर्फ गीता जोशी सायमी नियुक्त भएका छन् । साधारणसभाले स्वतन्त्र सञ्चालकमा टंकमणि शर्मालाई नियुक्त गरिएको छ । स्वास्थ्य क्षेत्रमा समेत अनुभव र प्रशासकीय अनुभव भएका शर्मा पूर्वमहालेखा परीक्षक हुन् ।
