रिडी हाइड्रोपावरले नयाँ आयोजना निर्माणको लागि हकप्रद शेयर जारी गर्ने

काठमाडौं, १९ असार । रिडी हाइड्रोपावर डेभलपमेन्ट कम्पनीले हकप्रद शेयर जारी गर्ने निर्णय गरेको छ । कम्पनीको संचालक समितिले हालको चुक्ता पुँजी ५० करोड १० लाख ५५ हजार एक सय रुपैयाँको सत प्रतिशत हकप्रद शेयर निष्कासनको निर्णय गरेको हो । कम्पनीले हकप्रद शेयर निष्कासनको सुचना नेपाल स्टक एक्सचेन्जलाई दिएको छ ।

यस कम्पनीले उक्त हकप्रद शेयर आगामी दिनमा निर्माण गर्न लागेको ८.५ मेगावाट क्षमताको बुटवल सोलार आयोजनाको लागि निष्कासन गर्ने जनाएको छ । उक्त हकप्रद शेयर जारीको लागि कम्पनीको आगामी वार्षिक साधारण सभामा अनुमोदन गरिने छ । साथै वार्षिक साधारण सभाले अनुमोदन गरेपछि हकप्रद शेयर निष्कासनको लागि कम्पनीले नेपाल धितोपत्र बोर्डमा अनुमतिको लागि आवेदन दिने बताएको छ ।