चारवर्षे कार्यकाल पूरा गरेर लगानी बोर्डबाट बाहिरिए पूर्व सीईओ भट्ट

काठमाडाैं, २३ साउन । लगानी बोर्ड नेपालका प्रमुख कार्यकारी अधिकृत (सीईओ) सुशील भट्टकाे ४ वर्षे कार्यकाल सकिएकाे छ । २०७७ साउन १९ गते बोर्ड सीईओ नियुक्त भएका भट्ट आफ्नो कार्यकाल पूरा गरेर  बोर्डबाट बाहिरिएका छन् ।

बोर्डका पदाधिकारीहरूले बुधबार भट्टलाई विदाइ गरेका छन् ।

आफ्नो चार वर्षको कार्यकालमा भट्टले बाेर्डको पहिलो रणनीतिक खाका, प्रोजेक्ट बैंक दिशानिर्देश, विभिन्न ज्ञान उत्पादनहरू, एएए परियोजना विकास र व्यवस्थापन अभ्यास, तथा प्रमुख नेपाल लगानी शिखर सम्मेलन २०२४ लगायत लगानी प्रवर्द्धन गतिविधिहरू अघि बढाएका छन्  ।

संस्थागत विकास, परियोजना कार्यान्वयन र सहजीकरणका साथै सहकार्य र साझेदारीका क्षेत्रमा उत्कृष्ट कामहरू गरेकाे बाेर्डले जनाएकाे छ । यस्तै बाेर्डले उनलाई कार्यकाल सफलतापूर्वक सम्पन्न गरेकोमा धन्यवाद तथा बधाई ज्ञापन गर्दै आगामी कार्यकालको लागि शुभकामना व्यक्त गरेकाे छ ।

यस्तै निवर्तमान सीईओ भट्टले आफ्नो चार वर्षे कार्यकालमा सहयोग गर्ने संघ संस्थालाई धन्यवाद  दिएका छन् ।