७ महिनामा करिब २७ अर्ब बराबरकाे विदेशी लगानी प्रतिबद्धता, १० हजार बढीले राजगारी पाउने
काठमाडाैं, ३ फागुन । चालु आर्थिक वर्षको सात महिनामा नेपाललाई करिब २७ अर्ब रुपैयाँ बराबरको विदेशी लगानी प्रतिबद्धता प्राप्त भएको छ । उद्योग विभागका अनुसार साउनदेखि माघसम्म तीन सय ८६ उद्योगका लागि २६ अर्ब ८४ करोड १७ लाख रुपैयाँ बराबरको लगानी प्रतिबद्धता प्राप्त भएकाे हाे ।
यस अवधिमा स्वचालित प्रणालीबाट एक सय ७५ उद्योगका लागि २ अर्ब ६२ करोड ८२ लाख रुपैयाँ रप्रमाणीकरण (स्वीकृति) प्रणालीबाट दुई सय ११ उद्योगका लागि २४ अर्ब २१ करोड ३४ लाख ७६ हजार रुपैयाँ बराबरको लगानी प्रतिबद्धता आएको छ।
माघ महिनामा मात्रै ३२ उद्योगका लागि १ अर्ब ६ करोड ५२ लाख ४५ हजार रुपैयाँ बराबरको लगानी प्रतिबद्धता आएको विभागले जनाएको छ ।
विभागका अनुसार सात महिनाको अवधिमा सबैभन्दा धेरै लगानी प्रतिबद्धता पर्यटन क्षेत्रमा प्राप्त भएको छ । सात महिनामा आएको कुल लगानी प्रतिबद्धतामध्ये पर्यटन क्षेत्रमा ४४ प्रतिशत अर्थात एक सय ६८ वटा उद्योगहरुका लागि आएको छ ।
यस्तै, सूचना प्रविधि क्षेत्रमा ३५ प्रतिशत अर्थात् एक सय ३४ वटा उद्योगका लागि लगानी प्रतिबद्धता आएको छ । विभागका अनुसार सेवा क्षेत्रका लागि ४८ वटा अर्थात १२ प्रतिशत, उत्पादन क्षेत्रका २७ वटा अर्थात ७ प्रतिशत, कृषिका ६ वटा अर्थात २ प्रतिशत तथा पूर्वाधार क्षेत्रको दुई उद्योगका लागि वैदेशिक लगानी प्रतिबद्धता प्राप्त भएको छ ।
सात महिनामा प्राप्त प्रतिबद्धता बमोजिम लगानी भित्रिएमा थप १० हजार सात सय २६ जनाले रोजगारी पाउनेछन् ।
