मधेस प्रदेशमा चाँडै नेपाली कांग्रेस नेतृत्वको सरकार बन्ने : देउवा

काठमाडाैं, २३ जेष्ठ । नेपाली कांग्रेसका सभापति तथा पूर्वप्रधानमन्त्री शेरबहादुर देउवाले मधेस प्रदेशमा चाँडै कांग्रेस नेतृत्वको सरकार बन्ने दाबी गरेका छन्।

शनिबार जनकपुरधामस्थित कांग्रेस मधेस प्रदेश कार्यालयमा सञ्चारकर्मीहरूसँग कुराकानी गर्दै देउवाले गठबन्धनबीचको पालो (रोटेसन) प्रणाली अनुसार प्रदेश सरकारको नेतृत्व अब नेपाली कांग्रेसले लिने बताए।

“सीपीएन (यूएमएल) र नेपाली कांग्रेसबीच प्रदेश सरकारको नेतृत्व पालो गरेर गर्ने सहमति भएको हो। त्यसअनुसार अबको पालो कांग्रेसको हो,” देउवाले स्पष्ट पारे। “यस विषयमा सत्ता साझेदारहरूसँग चाँडै छलफल हुनेछ। नेपाली कांग्रेसले मधेस प्रदेश सरकारको नेतृत्व गर्नेछ।”

उनका अनुसार सत्ता गठबन्धनको सहमतिअनुसार अगाडि बढ्न सबै तयार छन् र छिट्टै औपचारिक प्रक्रिया सुरु हुनेछ।

कार्यक्रममा नेपाली कांग्रेसका वरिष्ठ नेता विमलेन्द्र निधि, कृष्णप्रसाद सिटौला, नेता महेन्द्र यादव, मधेस प्रदेश कांग्रेस अध्यक्ष कृष्ण यादव लगायत नेताहरूको उपस्थिति रहेको थियो।

देउवाले पार्टीको संगठन सुदृढ बनाउने र लोकतान्त्रिक मूल्य–मान्यता अनुसार प्रदेश सरकार सञ्चालन गरिने प्रतिवद्धता पनि जनाए।

यसअघि प्रदेश सरकारको नेतृत्व एमालेले गरिरहेको छ। अब कांग्रेसले नेतृत्व लिएपछि प्रदेशको राजनीतिक समीकरणमा नयाँ मोड आउने विश्लेषण गरिँदैछ।