नेपालले बङ्गलादेशमा ४० मेगावाट विद्युत निर्यात सुरु गर्याे, पाँच महिनामा १.२९ अर्ब रुपैयाँ आम्दानी हुने
काठमाडाैं, १ असार । नेपाल सरकारले यस वर्ष असार १ गते (जुन १५) बाट बङ्गलादेशमा ४० मेगावाट विद्युत निर्यात सुरु गरेको छ। यो निर्यात भारतीय प्रसारण लाइनमार्फत सुरु गरिएको हो। गत वर्ष पहिलोपटक कात्तिक १८ गते (जुलाई १५) मा करिब १२ घण्टाका लागि बङ्गलादेशमा विद्युत आपूर्ति गरिएको थियो। त्यसपछि पुनः विद्युत निर्यात सुरु गरिएको यो दोस्रोपटक हो।
विद्युत निर्यातको पुनः सुरुवातसँगै नेपाल विद्युत प्राधिकरणले त्रिशुली जलविद्युत केन्द्रबाट १८.६० मेगावाट र चिलिमे जलविद्युत आयोजनाबाट २१.४० मेगावाट विद्युत बङ्गलादेश निर्यात गरिरहेको छ। यो निर्यात गत वर्ष असोज १७ गते नेपाल, भारत र बङ्गलादेशबीच भएको त्रिपक्षीय सम्झौताअनुसार सम्भव भएको हो।
विद्युत प्राधिकरणका अनुसार बङ्गलादेशमा निर्यात गरिने ४० मेगावाट विद्युत आगामी नोभेम्बर १५ (कार्तिक महिनाको अन्त्य) सम्म निरन्तर गरिनेछ। पाँच महिनाको अवधिमा जम्मा १४ करोड ६८ लाख ८० हजार युनिट विद्युत निर्यात हुनेछ। नेपाल विद्युत प्राधिकरण विद्युत प्रणाली नियन्त्रण विभागका उप–प्रबन्धक सुवर्ण सापकोटाका अनुसार यो निर्यातबाट नेपालले करिब ९४ लाख अमेरिकी डलर, अर्थात् १ अर्ब २९ करोड नेपाली रुपैयाँ आम्दानी गर्नेछ।
निर्यातको मूल्य निर्धारण ६.४० अमेरिकी सेन्ट प्रति युनिट गरिएको छ। यो विद्युत नेपालको ढल्केबर ४०० केभी सबस्टेशनबाट सुरु भई भारतको मुजफरपुर र बेहरामपुर हुँदै बङ्गलादेशको भेरमारा सबस्टेशनमा पुग्नेछ। उर्जामन्त्री दीपक खड्काले वर्षायाममा नेपालमा बढी उत्पादन भएको विद्युत छिमेकी मुलुकहरूमा निर्यात हुनुले देशको समृद्धि र उर्जा व्यापार विस्तारमा ठुलो उपलब्धि भएको बताए।
नेपालले विगत केही वर्षदेखि वर्षायाममा भारतमा समेत विद्युत निर्यात गर्दै आएको छ। यो वर्ष पनि जेठ १८ गते (जुन १) बाट हरियाणामा १८५ मेगावाट विद्युत निर्यात सुरु गरिएको थियो भने हाल सोही स्थानमा २०० मेगावाट पुर्याइएको छ। यसबाहेक शनिबारदेखि बिहार राज्यमा पनि ८० मेगावाट विद्युत निर्यात सुरु गरिएको प्राधिकरणले जनाएको छ। भारतमा निर्यात हुने विद्युतको मूल्य दर ५.२५ भारतीय रुपैयाँ प्रति युनिट तोकिएको छ।
ढल्केबर–मुजफरपुर ४०० केभी र १३२ केभी प्रशारण लाइनमार्फत समेत थप विद्युत खरिद–बिक्री भैरहेको छ। नेपाल सरकारले सन् २०३५ सम्म २८,५०० मेगावाट विद्युत उत्पादन गरी १५,००० मेगावाट निर्यात गर्ने लक्ष्य राखेको छ।
