उच्चस्तरीय सुशासन सुधार आयोगको दोस्रो बैठक आज, सार्वजनिक सेवा प्रवाह सुधारमा छलफल हुने
काठमाडाैं, ८ असार । प्रधानमन्त्री केपी शर्मा ओलीको अध्यक्षतामा गठित उच्चस्तरीय सुशासन सुधार आयोगको दोस्रो बैठक आज प्रधानमन्त्री तथा मन्त्रिपरिषद्को कार्यालयमा बस्दैछ। यस बैठकमा सार्वजनिक सेवा प्रवाहलाई अझ सरल, पहुँचयोग्य र झन्झटमुक्त बनाउने विषयमा छलफल हुनेछ।
संयुक्त सचिव डा. भीष्मकुमार भुसालका अनुसार, आजको बैठकको मुख्य एजेन्डा सेवा प्रवाहमा सुधार ल्याउनु रहेको छ। २०८१ वैशाख ८ गतेको मन्त्रिपरिषद्को निर्णयबाट गठन भएको यस आयोगको पहिलो बैठक असार ४ गते बसेको थियो। आयोगमा उपप्रधानमन्त्री तथा अर्थमन्त्री विष्णुप्रसाद पौडेल, गृहमन्त्री रमेश लेखक, कानुन, न्याय तथा संसदीय मामिला मन्त्री अजयकुमार चौरासिया, र संघीय मामिला तथा सामान्य प्रशासन मन्त्री राजकुमार गुप्ता लगायतका प्रमुख सदस्यहरू रहेका छन्। आयोगमा राजनीतिक दलबाट दुई जना र तीन जना विज्ञ (जसमा एक जना महिला अनिवार्य) मनोनयन गर्ने प्रक्रिया पनि चलिरहेको छ।
आयोगलाई भौतिक तथा मानवीय पूर्वाधार, कार्यविधि र प्रविधिलाई थप सेवामैत्री बनाउने जिम्मेवारी दिइएको छ। यसका साथै, निर्णय प्रक्रियामा हुने ढिलाइ हटाउने, जवाफदेहिता सुनिश्चित गर्ने, कार्य दोहोरोपन हटाउने र अन्तर-एजेन्सी समन्वयलाई सुदृढ पार्ने लक्ष्य पनि आयोगको रहेको छ। यस अतिरिक्त, आयोगलाई विद्यमान प्रशासनिक संरचना, कानुन र प्रक्रियाहरूलाई सङ्घीयता अनुकूल बनाउन सुधारका प्रस्तावहरू पेश गर्ने अधिकार दिइएको छ।
