यी हुन् ६ महिनामै सेयर मूल्य दोब्बर भएका ४ कम्पनी
काठमाडौं, ६ साउन। सेयर बजारमा उतार चढाव आउनु यसको विशेषता मानिन्छ । कुनै बेला सोचे भन्दा बढेर बुल मार्केटमा जाने त कोही बेला घटेर वियर मार्केटमा हिड्ने सेयर मार्केटको अर्को विशेषता मानिन्छ ।
विगत ६ महिनामा सेयर बजारको परिसूचक नेप्से १०.८८ प्रतिशत बढेको छ । गत माघ ६ गते २६०८ अंकमा रहेको नेप्से साउन ६ गते कारोबार खुल्नुअघि २८९४ अंकमा छ ।
६ महिनामा नेप्से १०.८८ प्रतिशत मात्रै बढ्दा चार कम्पनीको मूल्य भने शत प्रतिशत बढेको छ । ६ महिनामै मूल्य दोब्बर भएका चार कम्पनी हुन्– बुटवल पावर, एनआरएन इन्फ्रास्ट्रक्चर, राधि विद्युत् र नेपाल पुनर्बीमा कम्पनी ।
माघ ६ गते प्रतिकित्ता ३८६ रुपैयाँ मूल्य रहेको बुटवल पावरको मूल्य ६ महिनापछि अहिले ९५६ रुपैयाँ पुगेको छ । ६ महिनामै कम्पनीको मूल्य १४७ प्रतिशत बढेको छ ।
त्यस्तै ६ महिनाको अवधिमा एनआरएन इन्फ्रास्ट्रक्चरको मूल्य प्रतिकित्ता ११३९ रुपैयाँबाट बढेर २३४५ रुपैयाँ पुगेको छ । यो कम्पनीको मूल्य १०५ प्रतिशत बढेको छ ।
यो अवधिमा नेपाल पुनर्बीमाको मूल्य ७८५ रुपैयाँबाट बढेर १४९५ रुपैयाँ पुगेको छ । त्यस्तै राधि विद्युत्का् ३४६ रुपैयाँबाट बढेर ८१४ रुपैयाँ पुगेको छ ।
