११ ठेकेदार कम्पनी प्रतिबन्धमा, सरकारी लापरवाहीको चुकता

कालोसूचीमा परेका कम्पनीहरूमा कञ्चनपुरको राखी कन्स्ट्रक्सन, रोल्पाको जलजला मल्टी बिजनेस कन्स्ट्रक्सन, नेपालगञ्जको शिवम् कन्स्ट्रक्सन, काठमाडौंको जगदम्बा कन्स्ट्रक्सन, क्वालिटी इन्द्रावती कन्स्ट्रक्सन, सप्तकोशी जलाधार निर्माण कम्पनी, आशिभ निर्माण सेवा, ललितपुरको शैलुङ कन्स्ट्रक्सन, रुकुमको अमर हर्क दीपक कन्स्ट्रक्सन, बर्दियाको सदाशिव कन्स्ट्रक्सन र एक भारतीय कम्पनी आरावली इन्फ्रापावर लिमिटेड रहेका छन्।

अनुगमन कार्यालयले सोमबार सूचना प्रकाशित गर्दै ती कम्पनीहरूलाई विभिन्न अवधिको लागि कालोसूचीमा राखिएको जनाएको छ। तीमध्ये शैलुङ कन्स्ट्रक्सन र आरावली इन्फ्रापावर लिमिटेडलाई दुई वर्षका लागि, सप्तकोशी जलाधार र सदाशिव कन्स्ट्रक्सनलाई डेढ वर्षका लागि र बाँकी सबै कम्पनीहरूलाई एक वर्षका लागि सरकारी खरिद प्रक्रियाबाट निषेध गरिएको हो।

यी कम्पनीहरूलाई कारबाही गर्न विभिन्न सरकारी आयोजना कार्यालयहरूले सिफारिस गरेका थिए। सेती राजमार्ग दक्षिण खण्ड अन्तर्गत टिकापुर–लोडे–चैनपुर सडक योजनाले राखी र जलजला कन्स्ट्रक्सनलाई, सडक डिभिजन चौरजहारीले शिवम् र अमर हर्क दीपक कन्स्ट्रक्सनलाई, वाग्मती सभ्यता एकीकृत विकास समितिले क्वालिटी इन्द्रावतीलाई, पूर्वाधार विकास कार्यालय ओखलढुंगाले सप्तकोशीलाई, बढैयाताल गाउँपालिकाले सदाशिव कन्स्ट्रक्सनलाई र सरावल गाउँपालिकाले आशिभ निर्माण सेवालाई सिफारिस गरेका थिए।

सार्वजनिक खरिद नियमावली, २०६३ को दफा ६३ को उपदफा १ अनुसार कारबाही गरिएको जनाइएको छ। अनुगमन कार्यालयका अनुसार यस्तो कदमले सरकारी खरिदमा पारदर्शिता र जिम्मेवारीको भावना बढाउने अपेक्षा गरिएको छ।