महालक्ष्मी विकास बैंकलाई भारतको प्रतिष्ठित बैंकिङ अवार्ड
काठमाडाैं, १५ भदाै । ग्राहकलाई आधुनिक, सुरक्षित र सहज बैंकिङ सुविधा उपलब्ध गराउने महालक्ष्मी विकास बैंकले इन्डियन चेम्बर अफ कमर्स, कोलकत्ता, भारतबाट सम्मान प्राप्त गरेको छ। बैंकले “सम्पती गुणस्तर” विधामा यो प्रतिष्ठित अवार्ड पाएको हो।
अगस्ट २९, २०२५ मा नयाँ दिल्लीमा आयोजित तेस्रो इर्मजिङ्ग एसिया बैंकिङ कनक्लेभ एण्ड अवार्डस कार्यक्रममा बैंकले उक्त सम्मान हासिल गरेको हो। कार्यक्रममा भारत, श्रीलंका, नेपाल, म्यानमार र बंगलादेशका बैंकहरूले सहभागिता जनाएका थिए।
बैंकले सम्पतीको संरचना, प्रभावकारी परिचालन र गुणस्तर सुधारमा उल्लेखनीय कार्य गरेको कारणले यो सम्मान प्राप्त भएको महालक्ष्मी विकास बैंकले जनाएको छ। यस अवार्डले अन्तर्राष्ट्रिय स्तरमा बैंकको पहिचान सुदृढ बनाउन सहयोग पुर्याउने विश्वास लिइएको छ।
त्यसैगरी, हालै बैंक र एच.डी.एफ.सी बैंक, भारतबीच सीमा–पार वित्तीय सेवा प्रवद्र्धन र भुक्तानी प्रणाली सहज बनाउन समझदारी भएको छ। समझदारीअनुसार, ग्राहकहरूले भारतबाट नेपालमा सहज भुक्तानी गर्न सक्ने प्रणाली बैंकले सञ्चालनमा ल्याएको छ।
यस अवार्ड र नयाँ प्रणालीमार्फत महालक्ष्मी विकास बैंकले नेपालमा बैंकिङ सेवा र ग्राहक विश्वासमा नयाँ माइलस्टोन स्थापित गरेको देखिन्छ।
