नेपाललाई भारतले ४०० मेगावाट बिजुली बाट कटौती गरेर ८० मेगावाट मात्र दिँदै
काठमाडौं, १६ वैशाख । नेपालले भारतबाट सामान्य अवस्थामा दैनिक करिब ४०० मेगावाट बिजुली आयात गर्दै आएको थियो, तर पछिल्लो समय भारतमा विद्युत संकट हुँदा नेपालले दैनिक ८० मेगावाट बिजुली मात्र पाउन थालेको छ ।
नेपाल विद्युत प्राधिकरणका प्रवक्ता सुरेश अधिकारी ८० मेगावाट पनि मुस्किलले पाइरहेको बताएका छन । अहिले भारतका १८ वटा राज्यमा लोडसेडिङ सुरू भइसकेको छ । त्यहाँका धेरै जसो उद्योग बन्द भइसकेका कारण नेपालले भारतबाट बिजुली पाउन मुस्किल देखिएको अधिकारीले बताए ।
रूसले युक्रेनमाथि सैन्य हमला गरेपछि भारतको बिजुली उत्पादन प्रभावित भएको हो । भारतले जलविद्युत, वायु, कोइला, आणविक तथा सोलारबाट बिजुली उत्पादन गर्दै आएको छ । युद्धका कारण अन्तर्राष्ट्रिय बजारमा कोइलाको मूल्य अत्यधिक बढेपछि त्यसको असर बिजुली उत्पादनमा परेको देखिन्छ । डिजेल, पेट्रोल लगायत इन्धनको भाउ पनि अकासिँदा भारतीय बजारमा बिजुली खपत बढेको छ । यसले एकातिर बिजुलीको मूल्य चर्किएको छ भने अर्कातर्फ नेपालले पाउने बिजुलीसमेत कटौती भएको छ ।
भारतबाट ल्याउने बिजुली कटौतीपछि नेपालका उद्योगहरूमा दैनिक ३०० मेगावाट बिजुली अभाव भएको प्राधिकरणले बताएको छ । नेपालका उद्योगमा दैनिक पाँच सय मेगावाट बिजुलीको आवश्यकता पर्छ तर प्राधिकरणले दैनिक करिब दुई सय मेगावाट बिजुली मात्र दिन सकेको बताएको छ ।
यस्तै सामान्य अवस्थाको तुलनामा नेपालले भारतबाट किन्ने बिजुलीको मूल्य पनि तीन गुणा बढेको छ । प्राधिकरणका प्रवक्ता भट्टराईका अनुसार सामान्य अवस्थामा नेपालले भारतबाट औसत प्रतियुनिट चार रूपैयाँमा किन्ने गरेको थियो । अहिले बढेर औसत प्रतियुनिट १२ रूपैयाँ ८५ पैसा तिर्नुपरेको उनले बताए ।
