१७ करोड लिटर पानी १ लाख ७५ हजार धारामा वितरण हुँदै
वैशाख, १८ काठमाडौं । आइतबार बाट काठमाडौंमा मेलम्चीको १७ करोड लिटर पानी १ लाख ७५ हजार धारामा वितरण हुने भएको छ ।
काठमाडौं उपत्यका खानेपानी लिमिटेड (केयूकेएल) ले आइतबारदेखि नै मेलम्चीको १७ करोड लिटर पानी वितरण गर्न लागेको हो ।
गत वैशाख ११ गते काठमाडौंको मिनभवनबाट मेलम्चीको पानी वितरण थालिएको थियो । अब भने ९ ओटा भण्डारण केन्द्रबाट १ लाख ७५ हजार धारामा पानी वितरण हुने केयूकेएलले जानकारी दिएको छ ।
गत वर्ष नै मेलम्चीको १७ करोड लिटर पानी काठमाडौंमा वितरण शुरु भइसकेको थियो । तर वर्षायाममा मेलम्चीमा आएको बाढीले मेलम्ची खानेपानी आयोजनाको बाँधमा ठूलो क्षति पुर्याएपछि करीब १ वर्ष पछि पुनः पानी काठमाडौं आएको हो ।
