सेयर बजारमा ११ अंकको बृद्धि, भोली देखि अनलाईन कारोबार सुरु हुने
काठमाडौं, १९ कात्तिक । पछिल्ला केही साता देखि निरन्तर ओरालो लागेको सेयर बजार आज भने उकालो लागेको छ । आज नेपाल स्टक एक्स चेन्ज नेप्सेमा ११.९२ अंकले वृद्धि भएर १२ सय १९ दशमलव २० बिन्दुमा बन्द भयो ।
तिहारको पहिलो दिन र भोली देखी अनलाईन कारोबार सुरु हुने उत्साह सेयर बजारका लगानीकर्ताहरुमा देखिएको विश्लेषण गरिएको छ । कारोबार भएका कुल १ सय ५५ कम्पनीको ८ लाख २२ हजार २ सय ७ कित्ता सेयर खरिद बिक्री हँुदा २४ करोड ४५ लाख रुपैयाँ भन्दा बढीको कारोबार भएको छ ।
सबै भन्दा बढी प्रभु बैंकको सेयर कारोबार भएको छ । बैंकको आज ४ करोड १७ लाख रुपैयाँ भन्दा बढीको कारोबार भएको छ । यसैगरि नेप्सेमा सुचिकृत सबै समुहको परिसुचक बढेको छ । सबै भन्दा बढी निर्जीवनबीमा समुह ८७.४५ अंकले बढेको छ भने सबै भन्दा कम उत्पादन तथा प्रसोधन समूह ०.७ अंकले बढेको छ ।
आज लक्ष्मी लघुवित्त वित्तिय संस्थाका लगानीकर्ताहरुले धेरै कमाएका छन् । संस्थाको सेयर मुल्य ६ प्रतिशतले बढेको छ भने सबै भन्दा बढी गुमाउनेमा सृर्जना फाईनान्स वित्तिय संस्थाका लगानीकर्ताहरु रहेका छन् । यो संस्थाको सेयर मुल्य १.८६५७ प्रतिशतले घटेको छ ।
सेयर लगानीकर्ताहरुको लागि लामो समय देखि प्रतिक्षामा रहेका अनलाईन प्रणाली नेप्सेले मंगलबार देखि औपचारीक रुपमा संचालनमा ल्याउने जनाएको छ । जसको प्रभाव आजको बजारमा पनि देखिएको जानकारहरु बताउछन् ।
