पुस २१ गते काठमाडौंमा स्टार्टअप मेला हुने
काठमाडौं, १९ पुस । यहि पौष २१ गते शनिबार नेपालको सबैभन्दा ठूलो स्टार्टअप मेला जिबिजि बिजफेस्ट आयोजना हुने भएको छ। नेपालमा प्रविधि व्यवसायीहरूको समुह, गुगल बिजनेस ग्रुप काठमाडौंको आयोजनामा हुन लागेको उक्त मेला काठमाडौंको ज्ञानेश्वरस्थित ग्यालेक्सी स्कुल परिसरमा हुने छ ।
जिबिजि बिजफेस्ट नेपालमा पहिलो प्रविधि र व्यबसाय सम्बन्धि प्रदर्शनी हो । खल्ती डिजिटल वालेटसँगको मुख्य सहकार्यमा गर्न लागिएको यसमेलाको उद्देश्य देशभरबाट नव उद्यमीहरु र स्टार्टअप संस्थापकहरूलाई एउटै प्लेटफर्ममा ल्याउने र प्रवर्धन गर्ने रहेको जनाइएको छ। नेपालका सबैभन्दा लोकप्रिय एन्ड्रोइड एप्सका डेभलपरहरु र प्रतिनिधिहरू सहभागि हुने छन् । साथै, मेलामा गुगलका प्रविधिमा चासो राख्ने र स्टार्टअप गर्न इच्छुक तीन हजारभन्दा बढी अवलोकनकर्ताको सहभागिता रहने आयोजकको विश्वास छ ।
