दरवार हत्याकाण्डको १८ बर्ष पुरा, विरेन्द्रको वंशनास गराएको घटना अझै रहस्यमै
काठमाडौं,१९ जेठ । तत्कालीन राजा विरेन्द्रको बंशनाश भएको नारायणहिटी राजदरबार हत्याकाण्ड भएको १८ वर्ष पूरा भएको छ । आजको दिन जेठ १९ २०५८ सालमा भएको घटनामा राजपरिवारका अन्य सदस्य सहित राजा वीरेन्द्रको वंश नाश भएको थियो । तत्कालीन राजा वीरेन्द्र, रानी ऐश्वर्य, युवराज दीपेन्द्र, अधिराजकुमार निराजन, अधिराजकुमारी श्रुति, शान्ति राज्यलक्ष्मी सिंह, शारदा राज्यलक्ष्मी शाह, शाहज्यादी जयन्ती राज्यलक्ष्मी शाह, कुमार खड्गविक्रम शाह र अधिराजकुमार धीरेन्द्र शाहको हत्या भएको थियो । घटनामा कोमल शाह, शोभा शाही, कुमार गोरख शमशेर र केतकी चेस्टर घाइते भएका थिए । हत्याकाण्डका विषयमा विभिन्न चरणमा छानविन भएका छन् ।
तत्कालीन प्रधान न्यायाधीश धानन्यायाधीशको संयोजकत्वमा गठन भएको छानविन समितिले तत्कालीन युवराज दीपेन्द्रले हत्या गरेको प्रतिवेदन सार्वजनिक गरेपनि घटनाको १८ वर्ष पूरा हुँदा समेत सर्वसाधारण भने दीपेन्द्रलाई हत्यारा मान्न तयार छैनन् । सरकारले सो घटनाको सत्यतथ्य बाहिर ल्याउने प्रतिवद्दता जनाए पनि अहिलेसम्म कुनै कदम चालिएको छैन । सो घटना अझै रहस्य मै रहेको छ ।
