सेयर बजार घट्ने क्रम रोकिएन, परिसूचक १२८४.५९ को बिन्दुमा झर्यो

काठमाडौं, २३ जेठ । साताको अन्तिम कारोबार दिन आज पनि सेयर बजारमा गिरावट आएको छ । आज नेपाल स्टक एक्सचेञ्ज (नेप्से) परिसूचक ४.६९ अंकले घटेर १२८४.५९ को बिन्दुमा बन्द भएको छ।

पछिल्लो केही महिना यता बजारमा क्रमश गिरावट आइरहेको थियो । तर गत जेठ १५ गते सरकारले आगामी आर्थिक वर्षका लागि सार्वजनिक गरेको बजेट पुँजीबजारमैत्री भएकाले आगामी दिनमा बजारमा सकारात्मक प्रभाव पर्ने अपेक्षा लगानीकर्ताको थियो । तर त्यसपछिका केही दिन सकारात्मक देखिएको बजार पुन: ओरालो लागिरहेको छ।

आज कारोबारमा आएका होटल, विकास बैंक, फाइनान्स, म्यूचुअल फन्ड र अन्य समूहको उपसूचकमा बृद्धि भएको छ भने बाँकी अरु समूहको उपसूचकमा गिरावट आएको छ ।

एक सय ७२ कम्पनीको ५८ करोड ८८ लाख रुपैयाँ बजारको सेयर कारोबार भएकोमा शिवम् सिमेन्टको सबैभन्दा धेरै सेयर कारोबार भएको छ । कर्पोरेट डेभलपमेन्ट बैंक, गुडबिल फाइनान्स र वल्ड मर्चेन्ट बैंकिङ एन्ड फाइनान्स कम्पनीका लगानीकर्ताहरुले धेरै कमाएका छन् । धेरै गुमाउनेमा भने पाँचथर पावर कम्पनी, सिभिल लघुवित्त वित्तीय संस्था, माहुलि सामुदायिक लघुवित्त वित्तीय संस्थाका लगानीकर्ताहरु परेका छन् ।

Leave a Reply

Your email address will not be published. Required fields are marked *