मैलुङ राजमार्ग सञ्चालनको तयारी
रसुवा, ३१ भदौ । लगातार वर्षाका कारण अवरुद्ध मैलुङ-स्याफ्रुबेँशीखण्डको राजमार्ग सुचारु गराउने प्रयास द्रुत रूपमा अगाडि बढेको छ । जिल्ला समन्वय समितिका प्रमुख कुलप्रसाद भट्टका अनुसार स्याफ्रुबाट धुन्चे पुछारको त्रिशूली दोभानसम्म र मैलुङ तर्फबाट सोले दोभानसम्म राजमार्गको अवरोध हटाउने कार्य सम्पन्न भइसकेको छ ।
राजमार्गमा रहेका बाँकी अवरोध हटाउने काम भइरहेको र अब पाँच कि.मी. दुरी सफा गरेपछि यातायात संत्र्चालनमा आउने स्थलगतरुपमा खटिएका सासंद मोहन आचार्यले जानकारी दिए । राम्चे ग्राङबीचको पासाङल्हमु मार्गमा पहिरो गई मर्मत सम्पन्न गराउन समय लाग्ने भएकाले सांसद मोहन आचार्य प्रदेशसभा सदस्य प्रेम तामाङ, प्रभात तामाङ, शान्ति थिङ एवं स्थानीय प्रशासक, नेपाल कम्युनिष्ट पार्टी ९नेकपा०का अध्यक्ष कर्नेल तामाङ, नेपाली काङ्ग्रेसका सभापति पेम्बा छिरिङ तामाङसमेतको सहकार्यमा असारदेखि बन्द स्याफ्रु मैलुङ खण्डको राजमार्ग सञ्चालन गर्न काम अगाडि बढाइएको प्रमुख भट्टले जानकारी दिए ।
सडक सुधार कार्यमा मैलुङतर्फबाट स्थलगतरूपमै सासंद आचार्यका दाजु राममणी आचार्य, प्रदेशसभा सदस्य प्रेम तामाङ र प्रजिअ अर्जुन भण्डारीको अगुवाइमा द्रुत रूपमा काम अगाडि बढिरहेको छ । छोकलतर्फबाट गोसाइँकुण्ड गाउँपालिकाका अध्यक्ष कैसाङ नुर्पुको नेतृत्वमा काम अगाडि बढेको सडक सुधार आयोजनाले जनाएको छ ।
मैलुङ—स्याफ्रु नदी किनारको १७ किमि राजमार्ग गत असारदेखि र राम्चे खण्डको पासाङल्हमु मार्ग यही भदौ २५ गतेदेखि बन्द भएपछि केरुङबाट सामान लिई नेपाल भित्रिएका सात सय भन्दा बढी ट्रक तथा कन्टेनर रोकिएका छन्।
व्यापारीले दशैँका लागि ल्याएका सामान सडक अवरोधले टिमुरे क्षेत्रमा भरिभराउ भएको भन्सार कार्यालय टिमुरेका प्रमुख भन्सार अधिकृत पुण्यविक्रम खड्काले जानकारी दिए ।
