बैंक तथा वित्तीय संस्थाले उपयोग गरे १८ अर्ब ३८ करोड पुनर्कर्जा

काठमाडौं, १० वैशाख । उत्पादनशील उद्योग तथा निर्यातलाई प्रोत्साहित गर्ने उद्देश्यले केन्द्रीय बैंकले बैंक तथा वित्तीय संस्थालाई सहुलियत दरमा प्रदान गर्दै आएको पुनर्कर्जा गत फागुन मसान्तसम्ममा रू. १८ अर्ब ३८ करोड पुगेको छ । यसमध्ये साधारण पुनर्कर्जा रू. १५ अर्ब ८३ करोड र निर्यात पुनर्कर्जा रू. १ अर्ब १ करोड उपयोग भएको राष्ट्र बैंकको तथ्यांकले देखाएको छ ।
भूकम्पपीडितलाई आवासीय घर निर्माणका लागि सहुलियतपूर्ण कर्जा प्रदान गर्न राष्ट्र बैंकबाट बैंक तथा वित्तीय संस्थालाई उपलब्ध गराइएको पुनर्कर्जा सो अवधिमा रू. १ अर्ब ५३ करोड रहेको छ । यस्तो कर्जा कुल १ हजार ५९२ ऋणीले उपयोग गरेका छन् ।
उत्पादनशील क्षेत्रतर्फ लगानी र निर्यात विस्तारमा सहयोग पु¥याउने उद्देश्यले राष्ट्र बैंकले बैंक तथा वित्तीय संस्थालाई सहुलियत ब्याजमा पुनर्कर्जा दिन्छ । बैंक तथा वित्तीय संस्थाले साधारण पुनर्कर्जा ३ प्रतिशत र विशेष तथा निर्यात पुनर्कर्जा १ प्रतिशत ब्याजमा पाउँछन् ।