ब्रोकर कमिसन ३३ प्रतिशतले घट्यो, अब ०.२७ देखि ०.४० सम्म हुने
काठमाडौं, १० पुस । नेपाल धितोपत्र बोर्ड (सेबोन)ले ३३ प्रतिशतले ब्रोकर कमिसन घटाएको छ । आगामी आइतबारदेखि कार्यान्वयनमा आउँने गरी समग्रमा ३३ प्रतिशतले ब्रोकर कमिसन घटाइएको हो । अहिलेको ब्रोकर कमिसनमा ३३ प्रतिशत घटेपछि अब ०.२७ देखि ०.४० प्रतिशतसम्म तिर्नुपर्ने व्यवस्था गरेको नेपाल धितोपत्र बोर्डका प्रवक्ता निरज गिरीले जानकारी दिए ।
बोर्डले संगठित संस्थाको शेयरको प्रत्येक खरिद तथा विक्री कारोबारमा धितोपत्र दलाल व्यवसायी सेवा शूल्क वापत ५० हजार रुपैयाँसम्मको शेयर कारोबारमा ०.४० प्रतिशत, ५० हजारदेखि ५ लाख रुपैयाँसम्मको कारोबारमा ०.३७ प्रतिशत, ५ लाखदेखि २० लाख रुपैयाँसम्मको कारोबारमा ०.३४ प्रतिशत, २० लाखदेखि १ करोड रुपैयाँसम्मको कारोबारमा ०.३० प्रतिशत र १ करोड रुपैयाँभन्दा बढीको कारोबारमा ०.२७ प्रतिशत लिन पाउँने व्यवस्था गरिएको छ ।
त्यस्तै सरकारको जमानत वा पूर्ण सुरक्षित हुने गरी सरकारी संस्था वा नेपाल राष्ट्र बैंकले जारी गरेकोे ऋणपत्र तथा संस्थागत ऋणपत्रको खरिद विक्री कारोबारमा धितोपत्र दलाली वापत ५ लाख रुपैयाँसम्मको कारोबारमा ०.१० प्रतिशत ५ लाखदेखि ५० लाख रुपैयाँसम्मको कारोबारमा ०.०५ प्रतिशत र ५० लाख रुपैयाँभन्दा माधि जतिसुकैको कारोबारमा ०.०२ प्रतिशत शूल्क लिन पाउँने व्यवस्था गरेको छ ।
सामुहिक लगानी कोषको इकाई तथा अन्य धितोपत्रको हकमा भने ५ लाख रुपैयाँसम्मको कारोबारमा ०.१५ प्रतिशत, ५ लाखदेखि ५० लाख रुपैयाँसम्मको कारोबारमा ०.१२ प्रतिशत र ५० लाखभन्दा माथिको जतिसुकै कारोबारमा ०.१० प्रतिशत सेवा शूल्क लिन पाउने व्यवस्था गरिएको छ ।
धितोपत्र बजारलाई थप गतिशील बनाउँने सरकारको नीति तथा प्राथमिकता, अनलाइन कारोबार प्रणालीमा भएको सुधार र बजारमा लगानीकर्ताको सहभागिता र दैनिक रुपमा कोरोबार रकममा भएको वृद्धिलाई ध्यानमा राख्दै ब्रोकर कमिसन घटाइएको बोर्डले बताएको छ । ब्रोकर कमिसन घटाउँदा अन्तर्राष्ट्रिय अभ्यासलाई पनि प्राथमिकताका साथ हेरिएको बताइएको छ । पछिल्लो समय धितोपत्र बजारमा ८५ प्रतिशतभन्दा बढी कारोबार अनलाईनमार्फत हुने गरेको छ भने दैनिक कारोबार परिमाणमा पनि बढोत्तरी हुन थालेको छ ।
यस अघि ब्रोकर कमिसनको रुपमा न्यूनतम ०.४० प्रतिशतदेखि ०.६० प्रतिशतसम्म शेयर खरिद बिक्रीबापत लगानीकर्ताहरुले तिर्दै आइरहेका थिए ।
