बूढीगण्डकी आयोजनाका लागि करिब ४० अर्ब संकलन, निर्माण अघि बढाइने
काठमाडौं, २१ माघ । बहुप्रतीक्षित बूढीगण्डकी जलविद्युत् आयोजनाको निर्माण अघि बढाइने भएको छ । ऊर्जा, जलस्रोत तथा सिँचाइ मन्त्रालयमा मंगलवार आयोजित बूढीगण्डकी राष्ट्रिय सरोकार समितिका प्रतिनिधिसँगको छलफलमा मन्त्री टोपबहादुर रायमाझीले उक्त उद्घोष गरेका हुन् ।
१ हजार २०० मेगावाटको उक्त आयोजना निर्माणका लागि करीब ४० अर्ब संकलन भइसकेको बताइएको छ । यस्तै आयोजना निर्माणका लागि अधिग्रहण गरेको घरजग्गाबापत सरकारले ३४ अर्ब प्रभावित क्षेत्रका नागरिकलाई वितरण गरिसकेको छ ।
आफूले अघिल्लो पटक ऊर्जामन्त्री हुँदा आयोजनाको कामलाई अघि सारेको हुँदा अब छिट्टै शिलान्यास गरी निर्माण अघि बढाइने मन्त्री रायमाझीको भनाइ छ । तत्कालीन समयमा आफू पटक–पटक निर्माणस्थलमै गएर विभिन्न समस्या तथा चुनौती हटाउने कार्यमा जुटेको भए पनि छोटो समयमै सरकार ढलेकाले निर्माण कार्य अघि बढ्न नसकेको उनले बताए ।
विभिन्न जलविद्युत् आयोजनाको निर्माण कार्य चलिरहेको भन्दै मुलुक अब विद्युत् विक्री गर्ने अवस्थामा पुगेको मन्त्री रायमाझीले बताए ।
बूढीगण्डकी राष्ट्रिय सरोकार समितिका संयोजक हरेराम ढकालले घरजग्गाको ह्रासकट्टी र लाभ कर लिँदा स्थानीयवासीले उल्टै रकम बुझाउन पर्ने परिस्थितिको सिर्जना भएकाले ह्रासकट्टी र लाभकर बिना जग्गाको मुआब्जा दिनुपर्ने बताए ।
