सर्वाेत्तम सिमेन्टले आईपीओ निष्कासन नगरी लाभांश निर्धारण गर्नु नियम विपरित
काठमाडौं, १० चैत । सर्वाेत्तम सिमेन्टले आईपीओ निष्कासन गर्नु अगाबै लाभांश निश्चित गर्नु नियम विपरित भएको बताइएको छ । नेपाल धितोपत्र बोर्डका कार्यकारी निर्देशक तथा प्रवक्ता निरज गिरीले नेपाल आर्थिक पत्रकार संघ (नाफिज)ले आयोजना गरेको संवाद कार्यक्रममा बोल्दै सर्वाेत्तमको यस्तो घोषणालाई बोर्डले नियालिरहेको बताएका छन् ।
उनका अनुसार धितोपत्र निष्काशन गर्नु अगाबै बोनस शेयर र नगद लाभांश वितरण गर्ने घोषणा गर्नु धितोपत्र नियम विपरित हो । उनले भने, ‘धितोपत्र बोर्डले यो विषयलाई सुक्षम रुपमा हेरेको छ । सामान्य रुपमा आईपीओ जारी गर्नेले यस्तो घोषणा गरे कारबाही हुन्छ । तर, यो आईपीओ पहिलोपटक बुक विल्डिङ्ग विधिबाट निष्कासन हुँदैछ । त्यसैले झट्टै निर्णय गरिहाल्ने अवस्था छैन् ।’
सर्वाेत्तमले चैत २ गते पत्रकार सम्मेलन गरी ३ महिना भित्रै लगानीकर्तालाई १० प्रतिशत बोनश र २५ प्रतिशत नगद लाभांश दिने घोषणा गरेको छ ।
कम्पनीले कुल ६० लाख कित्ता आइपीओ वुक विल्डिङ्ग विधिमार्फत निष्कासन गर्न लागेको छ । जसमध्ये २४ लाख कित्ता सेयर योग्य संस्थागत लगानीकर्ताका लागि र बाँकी रहेको ३६ लाख कित्तामध्ये ८ लाख कित्ता स्थानीयबासीलाई, ३ लाख कित्ता कर्मचारीलाई र २५ लाख कित्ता सर्वसाधारणका लागि जारी जारी गर्ने जनाएको छ ।
