ग्लोबल आइएमईको डिबेन्चरमा मागभन्दा आवेदन
काठमाडौं, २३ चैत । ग्लोबल आइएमई बैंक लिमिटेडले जारी गरेको डिबेन्चरमा माग भन्दा बढी आवेदन परेको छ । बैंकले गत चैत्र १ गते ग्लोबल आइएमई बैंक डिबेन्चर २०८६÷८७ निष्काशन गरी बिक्री खुला गरेको थियो ।
बैंकले ३ अर्ब रुपैयाँ बराबरको १,००० प्रति ऋणपत्र अंकित मूल्यका ३० लाख कित्ता ऋणपत्र निष्कासन गरेको थियो । ऋणपत्र निष्काशन तथा विक्री चैत्र १६ गतेसम्मका लागि तोकिएको थियो ।
बैंकद्वारा जारी गरिएको ऋणपत्रमा न्यूनतम २५ कित्तादेखि अधिकतम १० लाख कित्तासम्म आवेदन दिन सकिने व्यवस्था थियो । १० वर्ष अवधिको उक्त ऋणपत्रमा वार्षिक ८.५ प्रतिशत ब्याजदर रहेको छ भने अर्धवार्षिक रुपमा ब्याज भुक्तानी हुनेछ ।
बैंकले ऋणपत्रको निष्काशन तथा बिक्री प्रबन्धकको रुपमा सेञ्चुरी क्यापिटल मार्केट्स लिमिटेडलाई तोकेको थियो । यसका साथै लगानीकर्ताले मेरो सेयरमार्फत अनलाइन र नेपाल धितोपत्र बोर्डबाट अनुमतिपत्र प्राप्त सि आस्बा सेवामा सहभागी बैंक तथा वित्तीय संस्थाहरू एवम् तिनका तोकिएका शाखा कार्यालयहरूबाट आवेदन दिन पाउने व्यवस्था रहेको थियो ।
