नेप्से परिसूचक ५५ अंकले वृद्धि, बढी शेयर मूल्य हुने कम्पनी बन्यो राष्ट्रिय बीमा कम्पनी
काठमाडौं, १९ जेठ । बुधबार नेप्से परिसूचक ५५.७६ अंकले वृद्धि भएको छ । सोमबार र मंगलबार लगातार घटेको बजार बुधबार (आज) २.०१ प्रतिशतले वृद्धि भएर २८२७.१२ विन्दुमा रोकिएको हो । आज कारोबार रकममा पनि सुधार भएको छ । हिजो ८ अर्ब रुपैयाँको शेयर कारोबार भएकोमा आज ११ अर्ब ३५ करोड रुपैयाँभन्दा बढीको शेयर कारोबार भएको छ ।
२१९ कम्पनीको २ करोड २६ लाख १३ हजार २९ कित्ता शेयर खरिद विक्री भएको छ । आज पनि नेपाल पुनर्बीमा कम्पनी लिमिटेडकै बढी मूल्यको शेयर खरिद विक्री भएको छ । यो कम्पनीको १ अर्ब ३७ करोड ८७ लाख रुपैयाँभन्दा बढीको शेयर खरिद विक्री भएको छ । यो कम्पनीको शेयर मूल्य १ हजार ७९० रुपैयाँ कायम भएको छ ।
सर्वाधिक शेयर मुल्य वृद्धि राष्ट्रिय बीमा कम्पनी लिमिटेड र सानिमा माइ हाइड्रोपावर कम्पनी लिमिटेडको भएको छ । यी कम्पनीको शेयर मूल्य १० प्रतिशतले वृद्धि भएको छ । राष्ट्रिय बीमा कम्पनी लिमिटेडको शेयर मूल्य १० प्रतिशत वृद्धि भएर सबैभन्दा बढी शेयर मूल्य हुने कम्पनी बनेको छ । यो कम्पनीको शेयर मूल्य २३ हजार ५९४ रुपैयाँ कायम भएको छ । आज मात्र यो कम्पनीको शेयर मूल्य २ हजार १४४ रुपैयाँ वृद्धि भएको हो ।
कारोबारमा आएका १३ समूहमध्ये म्युचुअल फण्ड समूहको परिसूचक घटेको छ भने बाँकी समूहको परिसूचक वृद्धि भएको छ । सर्वाधिक परिसूचक वृद्धि फाइनान्स समूहको भएको छ ।
