आइतबार नेप्से परिसूचक ५५ अंकले घट्यो, सबै समूहको परिसूचक राताम्य
काठमाडौं, १७ असोज । साताको पहिलो कारोबार दिन आइतबार नेप्से परिसूचक घटेर बन्द भएको छ । दसैँ लागेसँगै लगानीकर्ताहरु खर्च जुटाउँन लाग्दा पनि बजार घटेको बताइएको छ । गत हप्तादेखि नै लगातार घटेको बजार आज ५५.९३ अंकले घटेर २५७७.४९ विन्दुमा रोकिएको हो । गत कारोबारको तुलनामा परिसूचक २.१२ प्रतिशतले घटेको छ । आज सेन्सेटिभ इन्डेक्स २.२३ प्रतिशतले घटेर ४८५.९८ विन्दु रोकिएको छ ।
२३२ धितोपत्रको ८९ लाख ४८ हजार कित्ता शेयर ४ अर्ब ११ करोड ३८ लाख रुपैयाँमा खरिद विक्री भएको छ । आज सर्वाधिक शेयर मूल्य घट्नेमा गुहेश्वरी मचेन्ट बैंक एण्ड फाइनान्स कम्पनी, रइराङ हाइड्रोपावर डेभलपमेन्ट कम्पनी लिमिटेड लगायतको भएको छ । यी दुई कम्पनीको शेयर मूल्य ९ प्रतिशतभन्दा बढीले घटेको छ ।
आज कारोबारमा आएका १३ समूहकै परिसूचकमा कमी आएको छ । सर्वाधिक परिसूचक घट्नेमा फाइनान्स समूह रहेको छ । यो समूहको परिसूचक ४.३३ प्रतिशतले घटेको छ । त्यस्तैगरी हाइड्रोपावर समूहको ३.९६ प्रतिशत र लगानी समूहको ३.८३ प्रतिशतले परिसूचक घटेको छ ।
