लगानीकर्ता संरक्षण कोषमा ४७ करोड ९१ लाख जम्मा, नेप्सेले दुई लाख ५३ हजार थपेर २८ हजार फिर्ता लग्यो
काठमाडौं, १० असोज । गत आर्थिक वर्ष २०७९/८० को अन्त्यसम्ममा लगानीकर्ता संरक्षण कोषमा ४७ करोड ९१ लख ९१ हजार रुपैयाँ जम्मा भएको छ । कम्पनी रजिष्टार कार्यालयका अनुसार गत वर्ष मात्र यो कोषबाट ३६ लाख २० हजार रुपैयाँ कम्पनीहरूले फिर्ता लगेका छन् ।
गत वर्ष ११ कम्पनीले रकम फिर्ता लगेका हुन् । लगानीकर्ताको संरक्षणका लागि स्थापना भएको यो कोषमा हाल ५० वटा कम्पनीले रकम जम्मा गर्दै आएका छन् ।
लाभांशवापतको पैसा लिन नआउने लगानीर्ताको पैसा यो कोषमा जम्मा हुन्छ । पछि त्यो कम्पनीका लगानीकर्ता आफ्नो पैसा खोज्न आएमा यो कोषबाट दिने गरिएको छ । सोही अनुसार यो कोषमा लगानीकर्ताको पैसा नै राखिएको हुन्छ । कोष व्यवस्थापनमा नेपाल धितोपत्र बोर्डका अध्यक्ष वा उनले तोकेको पदाधिकारी, कम्पनी रजिस्टार र नेपाल स्टक एक्सचेन्ज (नेप्से)को प्रतिनिधि रहने व्यवस्था छ ।
यो कोषमा गत वर्ष करिब दुई करोड रुपैयाँ जम्मा भएको छ । जसमा नेप्सेले गत वर्ष दुई करोड ५३ लाख रुपैयाँ कोषमा जम्मा गरेको छ भने २८ हजार १५८ रुपैयाँ फिर्ता लगेको छ ।
अघिल्लो वर्षको अन्त्यसम्म यो कोषमा ४६ करोड २८ लाख ९९ हजार रुपैयाँ कायम थियो ।
