निर्माण क्षेत्रमा कर्जा प्रवाह बढ्दै, बैंकहरुले लगानीमा वृद्धि गरेका छन्

काठमाडाैं, १८ चैत्र । नेपालको निर्माण क्षेत्र आर्थिक शिथिलताका बीच विस्तारै सक्रिय हुँदै गएको छ। नेपाल राष्ट्र बैंकको पछिल्लो आँकडाका अनुसार, माघ मसान्त, २०८१ सम्म निर्माण क्षेत्रमा बैंकहरुले कर्जा प्रवाह ६.९० प्रतिशत बढाएका छन्। यसरी, निर्माण क्षेत्रमा कर्जा प्रवाहको कुल रकम २ खर्ब १ अर्ब २८ करोड ८३ लाख रुपैयाँ पुगेको छ, जुन अघिल्लो वर्षको सोही अवधिको तुलनामा १२ अर्ब ९९ करोड ५७ लाख रुपैयाँ बढी हो।

यस आर्थिक वर्षको माघ मसान्तसम्म २० वटा वाणिज्य बैंकहरुले निर्माण क्षेत्रमा कर्जा प्रवाह गरेको विवरण अनुसार, अधिकांश बैंकहरुले कर्जा लगानी बढाएका छन्। यद्यपि केही बैंकहरुमा गिरावट पनि देखिएको छ। निर्माण क्षेत्रको विस्तारमा बैंकहरुले गरेको लगानीको वृद्धि, सरकारको नीतिगत सहजीकरण र निजी क्षेत्रको लगानीमा सहजता ल्याउने प्रयासका कारण उल्लेखनीय छ।

कर्जा प्रवाहमा सबैभन्दा ठूलो योगदान नबिल बैंकको छ, जसले २४ अर्ब ६२ करोड २३ लाख रुपैयाँ कर्जा प्रवाह गरेको छ। यो कर्जा गत वर्षको माघ मसान्तको तुलनामा १२.०३ प्रतिशत बढी हो।

यसैगरी, एनआइसी एशिया बैंकले पनि निर्माण क्षेत्रमा कर्जा प्रवाहमा ठूलो वृद्धि देखाएको छ। यो बैंकले २३ अर्ब ११ करोड ६५ लाख रुपैयाँ कर्जा प्रवाह गरेको छ, जुन गत वर्षको तुलनामा ४३.३० प्रतिशत बढी हो।

अर्को तर्फ, नेपाल बैंक, सिटिजन बैंक, प्रभू बैंक, प्राइम बैंक, एनएमबी, कृषि विकास बैंक लगायतका बैंकहरुले पनि कर्जा प्रवाहमा वृद्धि गरेका छन्।

यद्यपि, लक्ष्मी बैंक, सनराइज बैंक, कुमारी बैंक, स्ट्याण्डर्ड चार्टर्ड बैंकका कर्जा प्रवाहमा केही कमी आएको छ।

यस सबै विवरणको आधारमा, निर्माण क्षेत्रको कर्जा प्रवाहमा देखा परेको यो वृद्धि आगामी दिनमा पनि जारी रहने सम्भावना छ।

निर्माण क्षेत्रमा कर्जा प्रवाह गरेको प्रमुख बैंकहरूको विवरण