सगरमाथा आरोहीहरूको पहिलो अन्तर्राष्ट्रिय भेला मे २७ मा काठमाडौंमा, १६ देशका आरोही सहभागी हुँदै
काठमाडाैं, ६ जेष्ठ । विश्वको सर्वोच्च शिखर सगरमाथा (माउण्ट एभरेस्ट) आरोहण गरिसकेका अन्तर्राष्ट्रिय आरोहीहरू पहिलोपटक एउटै मञ्चमा जम्मा हुने भएका छन्। ‘एभरेस्ट समिटियर्स समिट’ नामक यो विशेष कार्यक्रम मे २७ तारिख नेपालमा आयोजना हुँदैछ।
एभरेस्ट अलायन्स नेपालको आयोजनामा हुने यस भव्य कार्यक्रममा सगरमाथाको शिखर छुन सफल भएका ५०० जना भन्दा बढी आरोहीहरूको उपस्थिति रहने अपेक्षा गरिएको छ। हालसम्म १६ देशका १७७ जना आरोहीहरूले सहभागिताका लागि दर्ता गराइसकेका छन्।
अनुभव आदान–प्रदान र साहसिक पर्यटन प्रवर्द्धन मुख्य उद्देश्य
कार्यक्रमका आयोजक एभरेस्ट अलायन्स नेपालका अध्यक्ष सुदर्शन नेपालका अनुसार, यो भेलाले सगरमाथा आरोहण गरिसकेका व्यक्तिहरूलाई अनुभव साटासाट गर्ने अवसर प्रदान गर्नुका साथै साहसिक पर्यटन प्रवर्द्धन गर्न मद्दत पुर्याउने लक्ष्य राखिएको छ।
सगरमाथा आरोहणमा सहभागी भएका विकलाङ्ग व्यक्तिहरूसमेतले आफ्नो अभूतपूर्व अनुभव प्रस्तुत गर्नेछन्।
इतिहास बोकेको अनुहारको सम्मान
यस विशेष कार्यक्रममा सन् १९५३ को ऐतिहासिक आरोहण दलका अन्तिम जीवित सदस्य कञ्चा शेर्पालाई सम्मान गरिनेछ। उनी सर एडमण्ड हिलारी र तेन्जिङ नोर्गेसँगै पहिलोपटक सगरमाथाको चुचुरोमा पुग्ने टोलीको सदस्य थिए।
जलवायु परिवर्तनबारे महत्वपूर्ण छलफल
भेलामा पर्वतीय पारिस्थितिक तन्त्रमा जलवायु परिवर्तनले पारेको प्रभावबारे पनि गहन छलफल हुने आयोजकहरूले जनाएका छन्। यसका लागि WWF, ICIMOD, IUCN जस्ता संस्थाका प्रतिनिधिहरूले प्यानल डिस्कसनमा भाग लिनेछन्।
समर्थक संस्था र सहभागिता
कार्यक्रमलाई नेपाल एसोसिएसन अफ टुर एण्ड ट्राभल एजेण्ट्स (NATTA), ट्रेकिङ एजेन्सीज एशोसिएसन अफ नेपाल (TAAN), नेपाल पर्वतारोहण संघ (NMA), होटल एसोसिएसन अफ नेपाल (HAN) लगायतका प्रमुख पर्यटन क्षेत्रका संस्थाहरूले समर्थन गरेका छन्।
