‘इलेक्ट्रिक एण्ड इलेक्ट्रोनिक्स’ अन्तर्राष्ट्रिय प्रदर्शनी भृकुटीमण्डपमा सुरू
काठमाडौं, १३ भदौ । आजदेखि काठमाडौंको भृकुटीमण्डपमा ‘इलेक्ट्रिक एण्ड इलेक्ट्रोनिक्स’अन्तर्राष्ट्रिय प्रदर्शनी सुरू भएको छ । मिडिया स्पेस सोल्युसन्स, फ्युचरेक्स ट्रेड फेर एण्ड इवेंट्स,तथा एक्जीबीसन एण्ड ट्रेड सर्विसेस इण्डिया प्रालिको संयुक्त आयोजनामा सुरू भएको मेलाको उद्योग, वाणिज्य तथा आपूर्तिमन्त्री दामोदर भण्डारीले उद्घाटन गरेका हुन् ।
चौथो संस्करणको प्रदर्शनी भाद्र १५ गतेसम्म चल्नेछ । उद्घाटन समारोहलाई सम्बोधन गर्दै मन्त्री भण्डारीले यस्ता खालको प्रदर्शनीले उत्पादनलाई ब्राण्डिङ गर्न सहयोग गर्ने र उत्पादकलाई प्रोत्साहित गर्ने बताए । यसले उपभोक्ताहरूलाई आफ्नाे रुचीको सामग्री छान्ने अवसर मिल्ने पनि उनको भनाइ थियो।
यस प्रदर्शनीमा सहयोगी संस्थाको भुमिकामा नेपाल विद्युत प्राधिकरण र नेपाल सौर्य विद्युत उत्पादक संघ रहेका छन् ।प्रर्दशनीमा स्वदेशी तथा विदेशी कम्पनीहरुका १०० भन्दा बढी स्टलहरु छन्। यस प्रदर्शनीमा उच्च गुणस्तरका अत्याधुनिक एवं नवीनतम प्रविधिका ट्रान्समिसन तथा डिष्ट्रिव्यूसन सामाग्री, उर्जा आपूर्ति तथा कन्ट्रोल डिभाइस्, हाउस वायरिङ्गका सामाग्री, तार, केबुल एवं कण्डक्टर, अत्याधुनीक प्रकारका स्वीचहरु, एलइडी लाइटिङ्ग, इलेक्ट्रोनिक्स उपकरण, घरेलु विद्युतीय उपकरणहरू, चारजिङ्ग स्टेशन, ब्याट्री, कार्यालयमा प्रयोग हुने विद्युतीय प्रविधि तथा अन्य विद्युतीय सामग्रीका कम्पनीहरुको सहभागिता रहेको छ ।
आयोजकका अनुसार,विभिन्न विद्युतीय माध्यमहरुको प्रयोगमा वृद्धि गरि मुलुकमा बढ्दो जलविद्युतको उत्पादनको खपतमा वृद्धि गर्दै देशलाई आर्थिक रुपमा सबलिकरण गर्ने एवं उर्जा तथा विद्युतीय व्यवसायीहरूको समग्र विकास तथा व्यापार प्रवद्र्धनमा टेवा पुर्याउने उद्देश्यका साथ यस प्रर्दशनीको आयोजनागरिएको आयोजकले जनाएको छ ।
नेपाल कन्जुमर इलेक्ट्रोनिक्स एण्ड होम अपलायन्सेस अन्तराष्ट्रिय प्रदर्शनीअन्तर्गत दशैंको अवसर पारेर ग्राहकहरुले विभिन्न कम्पनीका विद्युतीय सामाग्रीहरु एकै ठाउँमा हेर्न तथा मन परेको सामान खरिद गर्नेजस्ता लाभ उठाउन सक्नेछन्।
